O Plan Único da Deputación financia con 241.029 euros melloras na seguridade viaria e no saneamento do Concello da Baña

O Plan Único da Deputación da Coruña destina 241.029 euros para mellorar a seguridade viaria e o servizo de abastecemento no Concello da Baña. Con esta achega, o ente provincial financia o 100% de tres actuacións de pavimentación e ampliación de vías no termo municipal e a dotación dunha rede de abastecemento de auga no lugar de Emes, na parroquia de Barcala.

Dentro das actuacións financiadas pola Deputación no municipio atópase a mellora de accesos entre Cores e Lameiro. Unha iniciativa para a que o ente provincial destina 67.160 euros e que contribuirá a incrementar a seguridade viaria na contorna, que conta cunha pavimentación deteriorada polo que se procederá a súa reposición con aglomerado en quente. Así mesmo, as tarefas ampliarán a vía en dirección Lameiro.

A institución provincial tamén financiará con 69.515 euros a pavimentación dos ramais da Tarroeira e Trasbarcala-Lte Negreira. Unhas estradas que contan cun abundante tráfico e que cuxo firme comezou a deteriorarse polo que se propón unha pavimentación con dous regos asfálticos.

Ambas actuacións inclúen a limpeza de beiravías e acondicionamento de tubaxes de pluviais e sinalización viaria. O seu prazo de execución fíxase en tres meses. As obras atópanse en fase de licitación e as empresas interesadas poderán presentar ofertas ata o 21 de marzo.

Por outra banda, a Deputación achega 56.270 euros para financiar o proxecto de mellora da seguridade viaria en Lañas e Fiopáns. A iniciativa permitirá pavimentar unha estrada en Lañas, unha vía que conta cun carácter estratéxico no municipio ao ser amplamente utilizada pola veciñanza. Tamén se acondicionará o firme de dous ramais de formigón en Vilar da Torre e Vilar de Suso. As medidas inclúen a limpeza de beiravías. As obras, que se atopan en fase de licitación ata o 22 de marzo, contan cun prazo de execución de tres meses.

Dentro das propostas que se han desenvolver na Baña, a Deputación licita por 48.084 euros o abastecemento de auga no lugar de Emes, na parroquia da Barcala. A través deste investimento a institución provincial colabora co Concello para dotar a unha poboación duns 70 habitantes dun servizo de subministración de auga municipal. Unha vez estea instalada a prestación, reporanse os firmes afectados pola actuación. O prazo de execución do proxecto é de tres meses e as empresas interesadas poderán presentar as súas propostas ata o 21 de marzo.