Extraordinaria acollida da convocatoria do ‘Fondo de proxectos culturais Reino de Galiza’
A área de Cultura da Deputación da Coruña recibe un total de 127 solicitudes para participar na divulgación e difusión do coñecemento sobre a historia medieval galega
Unha comisión de valoración avaliará todas as propostas presentadas co obxecto de selecionar os 20 proxectos que serán financiados con cargo a esta convocatoria. Cada proxecto seleccionado contará cun orzamento máximo de 12.500 euros
Curtas de animación, xogos interactivos, xogos de mesa, intervencións urbanas, roteiros físicos e virtuais, propostas escénicas, ensaios, antoloxías, álbums ilustrados, discos e ata propostas para series de televisión, dan conta da diversidade de iniciativas que conforman os 127 proxectos que concorren ao 'Fondo de proxectos culturais Reino de Galiza 2021-22'. Destaca, ademais, un significativo número de propostas que teñen como tema central as figuras femininas e o papel da muller na historia medieval galega.
"Ante o número de solicitudes recibidas non podemos máis que cualificar como extraordinaria a acollida desta convocatoria que, ademais de ser pioneira no país, evidencia un gran interese en desenvolver iniciativas relacionadas coa nosa historia medieval" asegura o deputado de Cultura, Xurxo Couto. O 'Fondo de proxectos culturais Reino de Galiza 2021-22', co que a área de Cultura inicia unha nova liña de traballo que ten a historia medieval como eixo central, vén de pechar nesta semana o prazo de recepción de solicitudes contabilizando ata 127 proxectos presentados. Nas vindeiras semanas pasarán a ser analizados por unha comisión de valoración, que será a encargada de seleccionar os 20 proxectos que serán financiados con cargo ao Fondo.
Convén lembrar que xa antes da apertura do prazo de solicitudes, o servizo provincial de Cultura recibira un importante número de consultas en relación a esta convocatoria. Neste sentido, Xurxo Couto asegura que "atendendo a este gran impacto, estamos estudando a posibilidade de darlle continuidade á convocatoria en vindeiros anos".
O 'Fondo de proxectos culturais Reino de Galiza 2021-22' conta cunha dotación orzamentaria de 250.000 euros para desenvolver proxectos en todo tipo de soportes e formatos, sempre que estean destinados a socializar e a poñer en valor a historia, as figuras, os lugares e os momentos do Reino medieval de Galiza. Esta convocatoria está especificamente destinada a empresas e persoas autónomas e de todas as propostas presentadas, seleccionaranse un total de 20 proxectos que recibirán unha contía máxima de 12.500 euros cada un.
O 'Fondo de proxectos culturais Reino de Galiza 2021-22' terá continuidade con novas iniciativas relacionadas coa historia medieval de Galiza que se desenvolverán, desde a área provincial de Cultura, tanto ao longo deste 2022 como en vindeiros exercicios.