Formoso destaca o traballo de integración social e laboral da ONG Ecos do Sur
O presidente da Deputación visitou hoxe a entidade para coñecer os programas que apoia a Deputación e que buscan a inclusión social e laboral de persoas en situacións vulnerables, especialmente poboación migrante e mulleres
![Formoso destaca o traballo de integración social e laboral da ONG Ecos do Sur](/files/cache/bb9521280ba120d5adbc7f3993c35652_f66952.jpg)
O presidente da Deputación da Coruña, Valentín González Formoso, acompañado da deputada de Política Social, Mar García Vidal, visitou hoxe a sede da ONG Ecos do Sur na cidade da Coruña co obxectivo de coñecer en primeira persoa o seu traballo, as súas necesidades e o funcionamento dos programas que contan co apoio económico da Deputación a través das liñas de subvencións para entidades sociais.
Formoso foi recibido pola vicepresidenta da entidade, Ana Ulloa, a directora xeral, Saray Durán, a responsable de Comunicación, Natalia Monje, e outras integrantes da xunta directiva, coas que coñeceu as instalacións de Ecos do Sur na avenida de Fisterra da cidade herculina, así como a historia da entidade o traballo que desde 1991 desenvolven no eido da integración social, especialmente vinculada ao acceso de dereitos da cidadanía e participación social de persoas migrantes, mulleres e colectivos en especial situación de vulnerabilidade.
A directora xeral de Ecos do Sur explicou que contan con sedes na Coruña e Madrid e que seguen un modelo de itinerario de inserción individualizado para cada persoa e de carácter interdisciplinar, que inclúe accións de asesoría xurídica, traballo social, mediación intercultural, apoio psicolóxico e formación e orientación laboral ou para o emprendemento.
"Desde a súa creación, Ecos do Sur contribuíu a mellorar a vida de miles de persoas e das súas familias. Para a Deputación da Coruña é unha gran satisfacción achegar ano tras ano o noso grao de area para axudar neste gran labor de integración tanto social como laboral que realizan coas persoas migrantes e que son dos factores fundamentais para que a sociedade vexa tamén a inmigración como unha oportunidade de enriquecer a sociedade galega, tendo en conta que Galicia necesita desta poboación", afirmou o presidente da Deputación, que destacou que segundo os datos que lle trasladaron as responsables de Ecos do Sur "o nivel de emprendemento nos migrantes que eles atenden é máis elevado que entre a poboación local, o que é un aspecto a ter en conta".
A preguntas dos xornalistas sobre a chegada a Galicia de refuxiados da Guerra de Mali, Formoso avogou por acollelos "con xenerosidade e implicándose na integración social, laboral e educativa destas persoas". "Nós desde a Deputación, como xa fixemos na Guerra de Ucraína, vimos de ofrecer ao Goberno 44 prazas para acoller a persoas refuxiadas na residencia do IES Rosalía Mera", lembrou.
Durante a reunión, as responsables de Ecos do Sur explicaron polo miúdo os distintos programas que desenvolven, entre eles o programa Ulises, que tamén conta co apoio da Deputación para atención psicosocial das persoas inmigrantes ou o programa Habita Rural, cun modelo de intervención destinado a aproveitar as oportunidades dos concellos máis pequenos e facilitar o asentamento de nova veciñanza nestes municipios. Este programa conta con 363 persoas inscritas, das que un 27% incorporáronse xa a vivir e traballar no rural, a maior parte delas en sectores como o agrogandeiro ou o da rehabilitación de vivendas.
Segundo explicaron as responsables de Ecos do Sur, sectores como a agricultura, a gandería ou a pesca teñen serias dificultades para atopar novos traballadores e para o relevo xeracional, que se están solucionando en boa medida con poboación migrante.