Regueira refírese en Xantar á gastronomía como “factor clave para ser máis competitivos mundialmente”

O 25º Salón Internacional de Turismo Gastronómico Xantar, que ten lugar en Ourense do 24 ao 27 de outubro, acolleu hoxe o acto central dedicado ao turismo, onde participou o vicepresidente e deputado de turismo, Xosé Regueira.

Regueira salientou durante a súa intervención a gran calidade da gastronomía, poñendo como exemplo a campaña turística e gastronómica 'A provincia que sabe', na que "estamos moi ben acompañados polos concellos pero sobre todo polas empresas que están facendo un moi bo labor na gastronomía, producindo alimentos de máximo nivel e recoñecidos mundialmente" destacou. "E, por suposto, tamén por cociñeiros que tratan con absoluta excelencia eses produtos que saen da nosa horta e do noso mar".

O vicepresidente afirmou que a gastronomía é un "elemento clave para ser máis competitivos" e, ademais, salientou que "temos a sorte de ser unha provincia que aínda mantén as catro estacións, un destino de refuxio, o que posibilita que contemos cunha cociña estacional, sendo moi atractivos en calquera mes do ano". E, engadiu, en calquera das estacións podedes atopar a mellor gastronomía".

A deputación participa nesta feira gastronómica cun stand propio onde promociona algúns dos destinos turísticos da provincia e a súa gastronomía, con diferentes actividades como showcookings ou degustacións. "Catro días, 17 festas gastronómicas das 123 que temos na provincia, máis de 20 degustacións e a boa acollida e o cariño que as nosas xentes, produtores, e representantes dos concellos dan ás persoas que nos visitan, podedes atopar neste espazo que temos aquí, en Xantar", anunciou Regueira. "Unha representación dos territorios ricos, diversos e de gran calidade que temos na Coruña".

Tras o acto oficial, o vicepresidente fixo entrega do premio ao mellor restaurante a Ourense Enogastronómica, promovido polos hosteleiros da cidade.

1 6

Fotogalería