A Deputación crea o Fondo de apoio a proxectos culturais singulares para a mellora social
Nesta primeira edición, o certame ten unha dotación de 300.000 euros, repartidos en vinte premios de entre 22.500 e 7.500 € para cada proxecto seleccionado
O prazo de presentación de solicitudes estará aberto entre o 21 de febreiro e o 21 de marzo
Premiará propostas dos eidos da igualdade, dereitos civís, respecto á diversidade, respecto medioambiental, cohesión social, integración social, memoria democrática ou sensibilización patrimonial e identidade local
"Na área de Cultura da Deputación apostamos por políticas públicas que poñan o foco na recuperación do sentido de identidade, de comunidade e de pertenza; en afianzar o vínculo social desde unha mirada democrática, inclusiva, diversa, acolledora e integradora", sinala a responsable do departamento, Natividade González
A área de Cultura da Deputación da Coruña vén de convocar a primeira edición do Fondo de proxectos singulares en lingua galega de especial interese cultural e orientados á mellora social. O prazo de presentación de propostas —a través da plataforma de tramitación electrónica da Deputación (SUBTEL)— estará aberto entre o 21 de febreiro e o 21 de marzo.
O novo certame premiará iniciativas culturais que desenvolvan propostas en lingua galega de interese para campos de acción social coma a igualdade, dereitos civís, respecto á diversidade, respecto medioambiental, medre da estima colectiva e cohesión social, integración social, memoria democrática ou sensibilización patrimonial e identidade local.
O fondo ten unha dotación de de 300.000 euros, repartidos en 20 premios polos seguintes importes máximos, que se reducirán se o importe do orzamento do proxecto seleccionado é menor:
- Para os cinco proxectos con maior puntuación, 5 premios por un importe máximo de 22.500 €
- Para os cinco proxectos seguintes en puntuación, 5 premios por un importe máximo de 17.500 € .
- Para os cinco proxectos seguintes, 5 premios por un importe máximo de 12.500 €.
- Para os cinco seguintes, 5 premios por un importe máximo de 7.500 €.
"Na área de Cultura da Deputación da Coruña", sinala a deputada de cultura, Natividade González, "apostamos por políticas públicas que poñan o foco na recuperación do sentido de identidade, de comunidade e de pertenza; en afianzar o vínculo social desde unha mirada democrática, inclusiva, diversa, acolledora e integradora".
Para a deputada, "a cultura é o espazo dos valores, das ideas, o fío que cose comunidade, identidade e sentido de pertenza". "A cultura", engade, "é relación, coñecemento, construción de civismo e de xeitos de estar na vida e no mundo; unha ferramenta de formación e transformación para a vida mellor".
O novo fondo é, segundo González, "outra aposta do noso departamento por políticas públicas que apoien claramente a diversidade cultural e garantan o dereito á produción e ao acceso cultural no noso idioma, que se atopa nunha situación preocupante». "Non desenvolver políticas de apoio á lingua galega supón contribuír, por abandono de responsabilidade pública, á súa minoración social e á continuidade e agravamento da desigualdade hoxe existente".
As bases do certame poden consultarse e descargarse no BOP do 14 de febreiro.