A Deputación destina 30.000 euros para o mantemento da Unidade de Condutas Aditivas de Carballo
A unidade, que presta servizo aos concellos das comarcas de Bergantiños e Costa da Morte, atendeu o ano pasado a 484 persoas
A Deputación da Coruña contribúe con 30.000 euros ao mantemento da Unidade de Condutas Aditivas (UCA) de Carballo.
Esta achega provincial articularase a través do convenio que hoxe asinaron, na sede da institución provincial, o presidente Valentín González Formoso e o alcalde de Carballo, Evencio Ferrero.
O presidente da Deputación subliñou que o convenio "contribúe a manter un centro que dá servizo a 15 concellos das comarcas de Bergantiños e Costa da Morte e que o ano pasado axudou a 484 persoas a abandonar os hábitos tóxicos, dende as drogodependencias ao consumo de alcohol ou tabaco".
Pola súa banda, o alcalde de Carballo agradeceu a colaboración que desde hai moitos anos vén prestando a Deputación para o sostemento do centro.
Ademais de Carballo, a UAD da servizo a Camariñas, Fisterra, Malpica, Cee, A Laracha, Muxía, Ponteceso, Coristanco, Laxe, Cabana, Vimianzo, Zas, Corcubión e Dumbría.
A Unidade de Condutas Aditivas de Carballo ofrece servizos de tratamento e prevención de consumo de drogas e alcohol, programa de incorporación social personalizada, actividades de coordinación con outros servizos sanitarios e sociais coma centros de saúde da comarca, centros penitenciarios ou o servizo de Psiquiatría do CHUAC.
No seu cadro de persoal conta con médico, enfermeira, psicóloga, traballadora social e persoal administrativo para prestar unha atención integral aos usuarios e usuarias, tanto no eido médico coma no psicolóxico e social.
