O donostiarra Palacio Kursaal convértese no escenario de presentación de ‘A paisaxe que sabe’
O restaurante Muka, situado no Palacio, acolleu hoxe o evento "A Coruña cos 5 sentidos", organizado pola área de turismo da Deputación para dar a coñecer a gastronomía da provincia entre o público profesional de Donostia
O vicepresidente, Xosé Regueira, foi o encargado de abrir o acto, conducido por Oraitz García, onde destacou que "a nosa cultura, identidade, lingua, maneira de vida... configuran un produto turístico de primeiro nivel. E temos que facer do turismo unha experiencia que se basee non so na cantidade senón na calidade, por iso estamos en Euskadi"
O cociñeiro André Arzúa (Espazo Abella) elaborou o menú, con produtos de A Despensa d'Lujo; polbo de Muros; berberechos de Noia; vieiras de Barallobre; da IXP Grelos de Galicia; as DOP Ternera Galega, Tetilla e Arzúa Ulloa, acompañados coas bebidas de Vermú Lodeiros; as IXP Viño da Terra de Betanzos e Barbanza e Iria, e a mellor xenebra do mundo, Vánagandr
O emblemático Palacio Kursal converteuse hoxe no escenario de presentación de "A paisaxe que sabe", cun evento organizado pola área de turismo da Deputación para poñer en valor a gastronomía da provincia entre o público profesional donostiarra. O vicepresidente, Xosé Regueira, foi o encargado de abrir o acto, conducido por Oraitz García, para posteriormente dar paso á degustación dun menú elaborado a base de produtos locais polo cociñeiro André Arzúa.
"Queremos que coñezades un pouco máis da nosa provincia a través dos nosos produtos" sinalou o vicepresidente, Xosé Regueira, durante a súa intervención. "Euskadi é para nós un territorio estratéxico, de cara a captar a un perfil de turista que valora todo o que podemos ofrecer. Por iso promovemos este tipo de eventos que repetiremos proximamente en Vitoria e Bilbao", anunciou. "A nosa cultura, identidade, lingua, maneira de vida... configuran un produto turístico de primeiro nivel. E temos que facer do turismo unha experiencia que se basee non so na cantidade senón na calidade, por iso estamos en Euskadi".
O millo corvo, as fabas e os chícharos bágoa de A Despensa d'Lujo; os berberechos de Noia; as vieiras de Barallobre; o polbo de Muros; os grelos da IXP Grelos de Galicia; a pescada de Ribeira; o porco celta; a costela da IXP Ternera Gallega; as patacas de Cositanco e o queixo das DOP Tetilla e Arzúa Ulloa compuxeron un menú que degustaron máis de 80 asistentes, maridado con Vermú Lodeiros; os viños de Adega Entre os Rios e Adegsa Cstellum Augusti (IXP Barbanza e Iria) e de Adegas Bordel (IXP Viños da Terra de Betanzos) e Vánagandr, a mellor xenebra do mundo elaborada en Cambre.
A Deputación presentaba, así, os "saberes e sabores" da provincia, "co obxectivo de poñer en valor o bo facer dos nosos produtores e produtoras locais e chefs", sinalou o vicepresidente, "e tamén para que coñezades de primeira man a nosa gastronomía, que para nós agora mesmo é un dos principais destinos turísticos da provincia, sinónimo de calidade, sustentabilidade e que ademais xera grandes oportunidades socioeconómicas no territorio". Regueira rematou convidando a todos os asistentes a visitar a provincia, "cos ollos moi abertos, e con ganas de coñecer unha cultura diferente e un territorio auténtico con moito que ofrecer".