A Deputación participa por primeira vez en Salón Gourmets, a feira de alimentación e bebidas de alta calidade, promocionando ‘A paisaxe que sabe’
A institución provincial contará con stand propio no evento internacional, que se celebra entre o 7 e o 10 de abril no Ifema de Madrid
No seu espazo levaranse a cabo máis de 40 actividades con produtores/as, chefs e produtos da provincia
A Deputación participa na 38ª edición do Salón Gourmets, a feira internacional de alimentación e bebidas de alta calidade, coa súa iniciativa 'A paisaxe que sabe'. A institución provincial contará cun stand propio no evento, que se celebra entre o luns 7 e o xoves 10 de abril no Ifema de Madrid.
No seu espazo, a Deputación ofrecerá un amplo programa con máis de 40 iniciativas repartidas ao longo dos catro días que dura o evento. Farao arredor da súa campaña 'A paisaxe que sabe', coa que pon o foco nos elementos paisaxísticos que alimentan a gastronomía da provincia e reforza a estratexia de compromiso cun turismo de calidade, que promova a preservación do medio e a mellora socioeconómica da contorna.
Deste xeito, chefs, produtos e produtores/as da provincia serán protagonistas no escaparate anual máis importante de alimentos e bebidas de alta gama dirixido, de xeito exclusivo, a profesionais da gastronomía. Cafés Lúa (Carballo), Galletas Martietas de Fío (Bergondo), Maruxas de Nata (San Sadurniño), A Despensa D'Lujo (Coristanco e Carballo), Vermú Lodeiros (Santiago de Compostela), Queixo Galmesán (Arzúa), Mariscos de Barallobre (Fene) e Vánagandr (Cambre) conforman o conxunto de produtos que as persoas asistentes poderán probar a través de degustacións.
Mentres, as cociñeiras e cociñeiros Nair González (Muelle 43, Mugardos), Antonio Amenedo (Pazo de Santa Cruz, Oza-Cesuras) e Alma García (GRECA, A Coruña) ofrecerán as súas creacións, ao igual que o sumiller Alejandro Paadín as súas relatorios e catas sobre Viños do Atlántico.
"A nosa participación neste foro responde á nosa aposta polo sector agroalimentario da provincia", sinalou o vicepresidente, Xosé Regueira. "Os produtores e produtoras locais que nos acompañan terán a oportunidade non só de dar a coñecer o seu traballo, senón tamén de xerar negocio e novas oportunidades comerciais, polo que para nós é un orgullo poder contribuír ao seu crecemento e visibilidade". "Pero non so iso", engadiu, "senón que tamén levaremos a chefs de referencia que prepararán bocados de primeiro nivel con alimentos que produce ese sector que está facendo un traballo excelente". "Deste xeito, ademais de poñer en valor a todos eses axentes que forman a cadea agroalimentaria da provincia, tamén faremos fachenda ante un público moi profesional de todo o que este territorio é capaz de ofrecer. A través das persoas, os produtos e as paisaxes; o eixo principal de 'A paisaxe que sabe'".
O Salón Gourmets cumpre este ano 38 edicións e, co seu espírito netamente comercial, está consolidando cifras de crecemento en canto a expositores (1.980 o último ano) e visitantes profesionais (case 107.000).
