O Festival de La Luz volve a Boimorto co apoio da Deputación da Coruña
O deputado Antonio Leira asistiu ao acto de presentación dos primeiros artistas do cartel de 2025 e entrega da recadación solidaria da pasada edición
O evento celebrarase do 29 ao 31 de agosto con artistas como Rozalén, Vivir Quintana, Ariel Rot, Dulce Pontes ou Coti
O Festival da Luz celebrarase este ano os días 29, 30 e 31 de agosto en Boimorto e contará coa presenza de artistas como Rozalén, a mexicana Vivir Quintana, Califato 3/4, Ariel Rot, Herdeiros da Cruz, Depedro, Dulce Pontes, Coti, Ultraligera, Mondra ou Los Limones .
O evento conta, un ano máis, co apoio da Deputación da Coruña, que colabora na parte musical e instala cada ano no recinto o seu Mercado de promoción de produtos agroalimentarios e artesanais locais.
O deputado Antonio Leira asistiu na Fundación Paideia da Coruña á presentación do evento, "que vai máis alá do aspecto musical, xa que é un grande escaparate para a provincia no que se mestura cultura, aposta polo rural e solidariedade".
No acto tamén se entregou a recadación solidaria do ano pasado a Agaela (Asociación Galega de Afectados pola Esclerose Lateral Amiotrófica), a principal beneficiaria dos fondos solidarios do ano pasado, cun total de 101.525 euros, Cruz Vermella e distintas entidades locais de Boimorto.
"Unha das razóns de ser do festival é poder axudar naquelas causas e a aquelas persoas desfavorecidas en moitos aspectos", sinalou Luz Casal.
A vicepresidenta de Agaela e afectada pola enfermidade, Susi Seoane, agradeceu "toda a axuda" que serve para mellorar a vida das persoas afectadas.
"Canto máis dura, máis fermosa é a vida, máis feroz é a súa garra. Cando cae a negra sombra sobre nós, preguntámonos canto tempo brillará a nosa estrela", proseguiu nunha emotiva intervención con letras da artista que promove o evento.
Entre as novidades do festival deste ano está unha nova ampliación do recinto, xunto co aumento da programación e da oferta familiar e infantil.
Tamén haberá unha importante aposta pola sustentabilidade, cunha celebración que xa conta con paneis solares para a zona familiar e xeradores que funcionan con biocombustibles.
