A deputada de Medio Ambiente, Rosa Ana García, participa nunha restauración mariña con Amicos
Na xornada participaron tamén os concelleiros de Política Social de Boiro, Raúl Treus; de Medio Ambiente e Medio Rural de Porto do Son, Juan José Calo; e o do Mar de Ribeira, Fernando Abraldes
A acción supuxo a solta de 110 laminarias e 4 gorgonias
Este mércores, 27 de agosto, a deputada responsable de Industria, Emprego, Política Demográfica e Medio Ambiente da Deputación da Coruña, Rosa Ana García; participou nunha xornada de restauración de fondos mariños da man de Amicos. Durante a mañá acompañárona tamén o concelleiro de Política Social de Boiro, Raúl Treus; o concelleiro de Medio Ambiente e Medio Rural de Porto do Son, Juan José Calo; e o concelleiro do Mar de Ribeira, Fernando Abraldes.
O obxectivo da xornada foi coñecer de primeira man as accións medioambientais de restauración de fondos mariños levados a cabo pola entidade no marco de distintos proxectos de protección e conservación da natureza, neste caso encadrados no hub Blue Mission de oceános e ríos.
A cita comezou no Centro de Atención Integral de Amicos, onde as activistas medioambientais do dual Natura II lles ensinaron ao grupo o Laboratorio de cultivo de macroalgas. Alí cultivan as laminarias, algas pardas que chegan ao centro como gametófitos e que posteriormente son devoltas ao mar cando cumpren as condicións óptimas para a súa devolución ao mar.
Se ben as gorgonias que quedan atrapadas nas redes dos pescadores e que son entregadas ao equipo de Amicos son rehabilitadas no Hospital de corais de Ribeira, os representantes institucionais tamén coñeceron en que consiste o proceso de recuperación destes corais, vitais para a biodiversidade mariña.
Trala explicación, o grupo dirixiuse a Aguiño, onde embarcaron para soltar un total de 110 laminarias e 4 gorgonias, da man da Confraría de Pescadores de Carreira-Aguiño, colaboradores da entidade neste tipo de accións medioambientais.
A deputada Rosa Ana García que quedou "abraiada coas instalacións" destacou: "Amicos é un claro exemplo de que o sostible e o social poden camiñar da man e que as persoas con discapacidade intelectual poden aportar moitísimo á sociedade; neste caso como referentes activistas e incluso científicos. Tamén quixo felicitar ao equipo e "darlles as grazas pola súa labor medioambiental e social, non só devolven a vida ao mar como no proxecto Cabalga, senón que tamén enchen á comunidade de oportunidades para todos e todas, un obxectivo primordial para a deputación".
Pola súa banda, a responsable do CAI de Amicos, Pilar Sampedro xeral de Amicos quixo explicar: "En Amicos non só facemos proxectos de sensibilización e accións de eliminación de residuos mariños, senón que tamén nos vemos no compromiso de recuperar o fondo mariño, a través da plantación de corais e algas. Con Cabalga intentamos comprometer tamén aos demais axentes comunitarios para que participen nestas xornadas como a de hoxe e así entre todos poder facer que os nosos mares estean limpos".
Tamén a axente medioambiental, Carol comentou a importancia do coidado do medio e "dar as grazas á xente que nos impulsa a mellorar o medioambiente" e subliñou "hai que ter presente que as persoas con discapacidade intelectual podemos con todo".
O coidado dos mares e a restauración activa dos fondos mariños é unha das liñas estratéxicas de Amicos, a través de distintos proxectos, tanto nacionais como internacionais, encadrados no hub Blue Mission. Nos últimos meses, a entidade realizou máis de 110 accións medioambientais, nas que se mobilizaron máis de 2000 voluntarios e voluntarias. Ademais, no que vai de ano, a entidade leva reinsertadas 460 gorgonias, 1120 unidades de zostera e 1150 soportes de laminarias.
