Trasanquelos acolle a xornada sobre arte, creación e territorio organizada por Cultura da Deputación
O programa desenvolverase hoxe na Fundación PazosCuchillo (Trasanquelos, Oza-Cesuras) e contará con diferentes presentacións, mesas redondas e relatorios, entre outras actividades
A deputada de cultura, Natividade González, inaugurou esta mañá esta vixésima edición das Xornadas 'A Cultura é un dereito', para posteriormente dar comezo a unha visita guiada á Fundación
A Fundación PazosCuchillo, en Trasanquelos (Oza-Cesuras) acolle hoxe a vixésima edición das Xornadas 'A Cultura é un dereito', organizada pola área de cultura da Deputación coa colaboración da propia Fundación e do concello de Oza – Cesuras, que nesta ocasión aborda a relación entre arte, creación e territorio, con diferentes presentacións, mesas redondas e relatorios, entre outras actividades. A deputada de cultura, Natividade González, inaugurou esta mañá o programa, acompañada da concelleira de sanidade, educación, servizos sociais e igualdade do Concello de Oza, Pilar Rilo; da comisaria das xornadas, Sara Fraga, e de Montse Chuchillo, da Fundación PazosCuchillo.
A deputada sinalou que "non é casualidade que estas xornadas se desenvolvan aquí", posto que "a comarca das Mariñas é un exemplo claro de vitalidade creativa. Aquí atopamos un tecido cultural diverso, comprometido e cheo de enerxía, no que creadoras, creadores e a propia sociedade teñen construído un mapa cultural plural e dinámico. Hoxe celebramos esa riqueza e abrimos un espazo para o encontro, o diálogo e a colaboración con persoas e proxectos doutros territorios".
"Nesta xornada teremos ocasión de coñecer artistas plásticos, escritoras, músicas, produtoras, xestoras culturais e responsables de espazos de referencia. Unha oportunidade única para tecermos redes, explorar fórmulas diversas de xestión cultural, compartir experiencias, enriquecer o noso propio traballo cunha ollada situada e colectiva e, por suposto, gozar da creación artística en sentido amplo, tamén dende o lecer e a convivencia" engadiu Natividade González. "Desde a Deputación acompañamos con orgullo esta iniciativa, convencidas de que a cultura é motor de cohesión, identidade e desenvolvemento para o noso territorio".
A Deputación busca con esta iniciativa consolidar un espazo de encontro entre profesionais da cultura, creadoras e creadores, institucións e público interesado, ao tempo que promove a visibilidade das prácticas culturais que se desenvolven no ámbito local e comarcal.
Programa
O programa abrirase ás 9:45 horas coa acreditación das persoas participantes e a benvida institucional a cargo de representantes da Fundación PazosCuchillo, do Concello de Oza-Cesuras, da Deputación da Coruña e da propia comisaria. Ás 10:00 terá lugar a presentación e visita guiada á exposición da Fundación, seguida dun relatorio sobre a realidade socioeconómica da comarca das Mariñas. Tras unha pausa café, celebrarase un coloquio centrado nos espazos de creación que impulsan a actividade cultural, coa participación da Fundación CIEC, a Libraría Biblos-Biblos Clube, o laboratorio creativo Espazo Vaina da asociación CRÚA, o Mosteiro de Bergondo e o Espazo BAM de Betanzos.
Pola tarde, o coloquio xirará arredor das persoas que fan cultura no territorio, con intervencións de diferentes creadoras e creadores como Carlos Pazos, Pedro Lamas, Antía Yáñez, Correa Corredoira, Iria Fafián, Isabel Durá, Sabela Caamaño e SaraSal. A xornada continuará coa crónica do día a cargo do escritor e xornalista Xesús Fraga, seguida das conclusións da comisaria Sara Fraga, e rematará cun concerto dos grupos Altalaplana e Furallefalle. Como actividade complementaria, organizarase unha visita guiada á Fundación PazosCuchillo, con prazas limitadas segundo orde de inscrición.
