A Deputación da Coruña presenta xunto a Luz Casal o Festival de La Luz 2025, que converterá Boimorto no epicentro musical e creativo da fin de semana en Galicia
O deputado provincial Antonio Leira presentou esta mañá xunto á artista Luz Casal unha nova edición do Festival de La Luz, que se celebrará esta fin de semana, os días 30 e 31 de agosto, no municipio natal da cantante, Boimorto. O evento reunirá a máis de 40 bandas e artistas nacionais e internacionais nunha proposta musical única que se complementa cun espazo gastronómico e un mercado de artesanía impulsado pola Deputación da Coruña.
O cartel desta edición destaca pola súa diversidade e calidade artística, con nomes de primeiro nivel como Rozalén, Califato ¾, Tanxugueiras, Ariel Rot, Heredeiros da Crus, Depedro, Dulce Pontes, Coti, Ultraligera, Rigoberta Bandini, Vivir Quintana, Mafalda Cardenal, Los Toreros Muertos, Triana ou Mondra, entre outros.
Ao abeiro do festival, a Deputación da Coruña promove un mercado de produtos locais e artesanía, no que participan máis dunha trintena de produtoras e creadores da provincia. Neste espazo, o público poderá coñecer e mercar directamente produtos de empresas como Bo Peixe, A Conserveira, Bonilla a la Vista, Casa da Avoa, Galmesán, Cafés Lúa ou Celtagal, así como creacións de artesáns e marcas como Redeiras Illa da Estrela, A Castrexa, Silvereira, Moira, Deica! Creacións, Carmela Mola ou Amor ó teu, entre moitas outras.
A programación da Deputación inclúe tamén un espazo gastronómico propio, con showcookings a cargo do chef André Arzúa, que elaborará receitas con produtos autóctonos de calidade como a Ternera Gallega, o porco celta, o bonito ou o queixo Arzúa-Ulloa.
"O Festival da Luz é un exemplo de como a cultura e o territorio poden ir da man. Aquí conviven a música de grandes artistas coa tradición gastronómica e artesanal da nosa provincia", sinalou o deputado Antonio Leira durante a presentación, destacando tamén o compromiso solidario do evento, que destina a recadación a proxectos sociais.
A Deputación da Coruña apoia un ano máis a un dos festivais máis singulares de Galicia, que celebra a cultura desde o rural para o conxunto da cidadanía.
