O RallyShow Deputación da Coruña encheu o circuíto das Pontes nunha xornada vibrante para o motor galego
Ao longo do día, 4.000 persoas seguiron o espectáculo, con carreiras corpo a corpo, exhibicións e actividades para toda a familia
Víctor Senra gaña a primeira edición do RallyShow Deputación, que aspira a consolidarse como referente no calendario do automobilismo
O circuíto municipal das Pontes viviu hoxe unha xornada histórica coa celebración do primeiro RallyShow Deputación da Coruña, un evento pioneiro no automobilismo galego que superou todas as expectativa e reuniu a máis de 4.000 afeccionados chegados de toda Galicia nunha emocionante xornada de competición e espectáculo.
O actual campión galego, Víctor Senra, a bordo do seu Hyundai i20 WRC proclamouse vencedor desta primeira edición do Rallyshow, impoñéndose nunha final vibrante que puxo en pé ás gradas do circuíto das Pontes. Co seu habitual estilo agresivo e preciso, Senra dominou cada unha das eliminatorias ata facerse co triunfo final nun formato que premiaba tanto a velocidade como a estratexia.
En segunda posición quedou o coruñés Daniel Berdomás (Hyundai i20 N Rally2) e de terceiro o piloto vigués Jorge Pérez, ao volante do seu Porsche 991 GT3. O formato eliminatorio e a proximidade ao público fixeron do RallyShow unha experiencia vibrante tanto para os pilotos como para os espectadores.
O presidente da Deputación e alcalde das Pontes, Valentín González Formoso, destacou durante a entrega de premios que "hoxe confirmamos que o RallyShow chegou para quedar. Esta primeira edición foi un éxito rotundo e demostra que hai espazo para un evento así no calendario do motor galego e estatal". Formoso agradeceu tamén "a implicación de todas as escuderías, pilotos, voluntariado e público, que fixeron posible esta xornada inesquecible".
A proba contou coa participación de pilotos de primeiro nivel e cun formato áxil que permitiu seguir desde as gradas- cheas desde primeira hora da mañá- e o entorno do circuito as eliminatorias desde os adestramentos ata a gran final, pasando por cuartos e semifinais. Entre cada manga, o público gozou das espectaculares exhibicións de drift dos BMW de Sito González, dos carcross e dos históricos Mini Cooper "Italian Job", que ofeceron un gran espectáculo de velocidade.
Un evento para toda a familia
Ademais do espectáculo deportivo, o RallyShow Deputación da Coruña ofreceu actividades para todos os públicos: animación, música, foodtrucks, circuito infantil de karts para os pequenos afeccionados ao mundo do motor, sorteos e codrives con pilotos profesionais para vivir en primeira persoa o espectáculo do rally.
Con entrada gratuíta, un amplo aparcamento exterior anexo ao circuíto e un dispositivo organizativo que garantiu en todo momento a comodidade e seguridade do público, o RallyShow Deputación da Coruña demostrou que é posible combinar competición e espectáculo, marcando un antes e un despois no calendario galego do motor.
