Encontro con Cecilia F. Santomé, autora de "As despedidas"
Encontro virtual con Cecilia F. Santomé:
- 14 de xaneiro ás 18:00h
- Accede aquí: https://meet.google.com/iib-xvce-hqx
Encontro en liña con Cecilia F. Santomé, na sala Tinta e equidade do Club de lectura virtual da Biblioteca Provincial da Deputación da Coruña.
Cecilia F. Santomé, a autora de "As despedidas", vai estar partillando con nós. Trátase dunha xuntanza en liña para comentarmos esta lectura do Club Tinta e equidade, que leva a cabo a Biblioteca coa Área de Igualdade da Deputación da Coruña.
- Terá lugar o vindeiro 14 de xaneiro ás 18h
- Accede nesta ligazón: https://meet.google.com/iib-xvce-hqx
- Préstate a obra aquí: https://ebiblio.dacoruna.gal/info/as-despedidas-00458672
- Máis información sobre a lectura en: https://ebiblioclub.dacoruna.gal/clubs/67c04e232932a704a52834f7/contents/694259f3eba4b5b949d99a56
Conéctate e comparte as túas impresións connosco!
Máis información sobre o funcionamento do eBiblioDaCoruna Club Lector en: https://dacoruna.gal/biblioteca/ebibliodacoruna/ebibliotecadacoruna-club-lector/
As despedidas
«O avó morreu hoxe. Ou quizais foi onte».
Así, entre titubeos, arrinca esta crónica íntima dun dó con sabor a outro tempo. Un en que os defuntos eran velados nas casas, en que as capelas ardentes permanecían abertas día e noite e en que os curas eran salvadores de almas... e mesmo de pelellos cando a loxística non acompañaba.
Velaquí setenta e dúas horas nunha burbulla de silencio, tristeza e fastío que se converten nun exercicio memorístico. Xestos, movementos e espazos que desencadean lembranzas, fiando unha elexía por quen marchou, pola propia infancia, por unha forma de vida que se esfarela no aire. E todo iso para chegar a unha conclusión: unha neta sen o seu avó é unha orfa de segunda.
Cecilia F. Santomé
Cecilia F. Santomé (San Simón, Vilalba, 1984) é tradutora, narradora e lingüista. Leva anos desenvolvendo o seu interese pola palabra escrita en eidos diversos, desde a redacción de contidos dixitais á formación en biblioteconomía. A súa experiencia en proxectos de xornalismo colaborativo («Toonari Post», «55 Pages») inspirou a creación de «Coolt», revista en liña que codirixiu e editou entre os anos 2016 e 2018. En 2017, recibiu o Premio Literario Nortear para a mocidade escritora de Galicia e do Norte de Portugal polo seu relato «34, Rue Saint Jacques». En 2021, foi recoñecida co 3º premio no Certame de Narracións Breves Manuel Murguía por «As orfas daquel verán». «As despedidas» (Xerais, 2024) é a súa terceira novela, tras «Quérote. Eu tampouco» (Xerais, 2019) e «Unha rapaza de provincias» (Xerais, 2021).
Foto da autora: Te Valcárcel para Mermaid Photo.
Fonte: Web da editora Xerais