A Copa Deputación de fútbol feminino dispútase o 5 de setembro en Pontedeume
Centos de afeccionados congregaranse no campo de fútbol da Gándara para gozar dos encontros de semifinais e a gran final a partir das 19:00 horas
O campo de fútbol da Gándara, no concello de Pontedeume, acollerá o sábado, 5 de setembro, a fase final da Copa Deputación de fútbol feminino, na que se darán cita a SR San Xoán de Calo, o Atlético San Pedro, o Xallas FC e a SD O Val.
A competición comezará pola mañá cos partidos de semifinais. Ás 10:30 horas dará arranque a competición co enfrontamento entre o Atlético San Pedro e a SD O Val; seguido, ás 12:30 horas, xogarase o Xallas FC contra a SR San Xoán de Calo. Xa pola tarde, a partir das 19:00 horas, arrancará a gran final que coroará ao equipo campión do fútbol feminino coruñés.
En categoría feminina, ao igual que na masculina, a Copa Deputación outorga 12.000 euros en premios (5.000 ao campión, 4.000 ao subcampión e 1.500 aos dous semifinalistas eliminados).
Á entrega de premios, que terá lugar inmediatamente despois de coñecer ao equipo campión, asistirán en representación da Deputación da Coruña o voceiro do goberno provincial e alcalde de Pontedeume, Bernardo Fernández, e o deputado de Deportes, Antonio Leira.
A organización do torneo espera que esta cita converta Pontedeume e o campo da Gándara no epicentro do fútbol feminino galego durante a xornada do sábado, atraendo a centos de persoas a gozar dunha xornada de fútbol.