Raposa, banda gañadora da gala final do Premio Narf
Raposa resultou gañadora, con 4.000 euros de premio, nunha gala final que tivo lugar esta noite no Salón Teatro de Santiago e cuxos contidos lembraron en todo momento a figura de Fran Pérez no seu décimo cabodano
A votación do xurado puxo en segundo lugar a Sofía Espiñeira e en terceiro a Abril
Raposa é a banda gañadora do XVIII Concurso Fran Pérez "Narf" para grupos e artistas musicais que promove a Deputación da Coruña. O ditame do xurado enxalzou ao grupo Raposa nunha gala final na que Sofía Espiñeira rematou segunda e Abril terceira. A edición deste ano xirou arredor da figura de Fran Pérez no seu décimo cabodano, coa actuación d'Os Quinindiolas, que regresaron 30 anos despois para homenaxear o seu compañeiro nun acto que estivo conducido polo xornalista Luís Pardo e no que tamén participou o artista visual Xavier Belho.
RAPOSA: A banda pontevedresa integrada por María Villanueva e Rubén Abad fai unha aposta que sobrevoa paisaxes batuxados por música clásica, jazz, músicas do mundo, canción protesta ou pop, nunha execución desbordante de matices e delicadeza. Deles o xurado destacou a súa "proposta musical exquisita, cuns arranxos impecables e unha voz delicada, fermosa e con dinámica".
A gala acolleu as actuacións de 15 minutos das tres bandas finalistas e o xurado (formado polos músicos Mercedes Peón e Ramón Bermejo, os xornalistas Javier Becerra e Ana G. Liste, e a programadora Noemí Vázquez) decidiu o gañador, que leva 4.000 euros, alén de varias actuacións en festivais galegos; o segundo clasificado 2.000 e o terceiro 1.500. Durante a súa deliberación, os asistentes puideron desfrutar da actuación de Os Quinindiolas, que regresaron aos palcos 30 anos despois con Xelís de Toro, Marcos Teira, Pepe Sendón e Mon Orencio, como incorporación para este concerto. Esta banda de rock en galego, da que formou parte Fran Pérez, estivo activa entre 1988 e 1992 e estiveron na vangarda da música naquel momento.
O xurado destacou da banda gañadora a súa excelencia instrumental, unha dinámica sorprendente, unha voz exquisita e chea de emoción e a profundidade das súas letras, nun espectáculo de extraordinaria beleza que conseguiu conmover e transmitir unha intensa emoción ao público.
A gala comezou forte emocionalmente falando cunha escenografía presidida pola guitarra e outros obxectos artísticos de Narf e co tema "Mercedes" do propio autor interpretado por Marcos Teira abrindo o espectáculo. Os efectos visuais -responsabilidade do artista Xavier Belho- remitiron a diferentes momentos da vida artística de Fran Pérez.
As bandas que resultaron finalistas entre os máis de 30 candidatos que se presentaron ao XVIII Concurso Fran Pérez "Narf" para grupos e artistas musicais son:
SOFÍA ESPIÑEIRA: Artista multidisciplinar, tamén actriz, acróbata e bailarina, esta cantora de Mugardos publicou o seu segundo disco, 'Xeografías', un relato que fala de travesías utópicas, de raíces, de fronteiras e éxodos. Dela o xurado salientou que é "unha compositora inquieta e con personalidade e cun discurso propio e arranxos moi coidados".
ABRIL: Claudia Abril (voz e percusións) e Marina Carpente (violín e voz) integran este proxecto no que melodías tradicionais galegas e ibéricas son adaptadas a sonoridades actuais con certa intimidade, personalidade e frescura. Abril é unha proposta de folk contemporáneo na que instrumentos de música tradicional como a pandeireta, o pandeiro ou o violín folk dan lugar a un coidadísimo repertorio que contribúe a poñer en valor a música tradicional galega sen deixar de lado a modernidade. O xurado definiunas como "dúo que recolle o legado dunha cosmovisión colectiva, cunhas composicións contemporáneas liderado por unha voz exquisitamente ornamentada".
