A Deputación participa mañá nunha xornada informativa sobre as axudas do PEL para empresas do coworking Accede Papagaio
A xornada desenvolverase en horario de mañá, de 10.00h a 12.00h
A inscrición é gratuíta e debe realizarse cubrindo un formulario en liña
![A Deputación participa mañá nunha xornada informativa sobre as axudas do PEL para empresas do coworking Accede Papagaio](/files/cache/e132235e618a16b43de1d220e166047e_f55200.jpg)
Mañá venres, 24 de febreiro, persoal técnico do Plan de Emprego Local (PEL) da Deputación da Coruña participará nunha xornada informativa sobre axudas públicas dirixida a empresas e persoas emprendedoras.
Este evento, que ten por obxectivo dar a coñecer os recursos dispoñibles para o tecido empresarial da cidade terá lugar no Centro Municipal de Empresas Accede Papagaio do Concello da Coruña, rúa Hospital, núm. 19.
A xornada estruturarase arredor dunha mesa técnica interinstitucional na que as persoas asistentes poderán coñecer a oferta de subvencións dispoñibles ás que poden optar, tanto para poñer en marcha a súa iniciativa empresarial como para impulsar empresas que xa están en funcionamento.
A mesa estará coordinada pola xefa do Departamento de Promoción Económica e Comercio do Concello e contará coa participación de Beatriz Mariño, xefa do servizo de Emprego e Empresa; Esther Reíllo, técnica de proxectos do Plan de Emprego local da Deputación; e Patricia López, xefa do servizo de Fomento ao Emprendemento da Xunta.
O espazo informativo terá lugar en horario de mañá, de 10.00 h a 12.00 h. A inscrición é gratuíta e debe realizarse con carácter previo cubrindo o seguinte formulario en liña: https://docs.google.com/forms/d/e/1FAIpQLSfgCcaz7E-dLMpjgVL8Icwm0zPq5-ttaCBDmrBn4NrWwxD8IA/viewform
Pode atopar máis información sobre as liñas de axudas do Plan de Emprego Local en pel.gal/axudas