A Deputación apoia con 380.000 euros o mantemento de conservatorios, escolas de música e danza en 30 municipios da provincia
Formoso subliña a aposta da Deputación "por facer accesible a formación cultural a todos municipios de toda a provincia, máis alá das áreas urbanas"
As achegas son de 10.000 euros para as escolas de música e 20.000 para os conservatorios
A Deputación da Coruña inviste este ano 380.000 euros no mantemento de conservatorios, escolas de música e de danza municipais. O Boletín Oficial da Provincia (BOP) publica hoxe a concesión provisional das achegas, das que se benefician este ano un total de 30 concellos da provincia.
Con estas achegas, a Deputación axuda a concellos e entidades locais co financiamento para conservación e equipamento das escolas e conservatorios, contratacións externas e subministracións, entre outros. As municipios con escolas de música e danza reciben 10.000 euros, mentres que aqueles que contan con conservatorio reciben 20.000 euros.
O presidente Valentín González Formoso destacou o compromiso da Deputación da Coruña por "facer accesible a formación en música e danza aos municipios de toda a provincia, máis alá das grandes cidades, co fin de que a rapazada dos pequenos e medianos concellos tamén poidan gozar das mesmas oportunidades que as áreas urbanas".
Pola súa banda, a deputada de Educación, Sandra González, subliñou que con estas axudas "queremos impulsar a formación artísticas nos diferentes centros da provincia, nos que sabemos que hai un talento moi importante que queremos seguir potenciando". A deputada incidiu en que moitos destes centros dan servizo "de ámbito comarcal", permitindo a alumnos dun gran número de concellos da provincia acceder a estas formacións no eido da música e a danza.
A Baña, As pontes, Abegondo, Ames, Arzúa, Betanzos, Brión, Cabana de Bergantiños, Carballo, Carnota, Cee, Culleredo, Melide, Mugardos, Muros, Negreira, Noia, Oleiros, Ordes, Oroso, Ortigueira, Padrón, Ponteceso, Porto do Son, Ribeira, Rois, Sada e Santiago son os municipios beneficiados por este programa da Deputación.
A concesión provisional das axudas pode consultarse na seguinte ligazón:
https://bop.dicoruna.es/bopportal/publicado/2023/04/11/2023_0000002592.html