A Deputación da Coruña financia 411.000 horas de servizo de axuda no fogar nos concellos da provincia

A Deputación da Coruña publica hoxe no BOP a concesión provisional do programa de Servizos Sociais Comunitarios 2023, que reforza os recursos de protección social dos concellos coruñeses cunha achega de 8,3 millóns de euros, o que permitirá financiar 411.000 horas de servizo axuda no fogar (24.000 horas máis que o ano pasado) e contratar a 179 profesionais do ámbito social nos municipios de menos de 20.000 habitantes da provincia.

O presidente provincial, Valentín González Formoso, destacou a importancia deste programa, "que permite reforzar a axuda no fogar, un servizo esencial para miles de persoas maiores ou con discapacidade e as súas familias e ao mesmo tempo dá emprego a moitas persoas, especialmente nos concellos máis pequenos".

Neste sentido, o presidente subliñou que, ademais das persoas que traballan directamente na axuda no fogar, este programa permite tamén contratar nos concellos durante un ano a 179 profesionais especialistas no ámbito social para atender as necesidades das persoas máis vulnerables.

O SAF garante o benestar e a atención ás persoas maiores, evitando o seu desarraigo ao permitir que sigan vivindo no seu fogar e favorecendo a conciliación laboral e a tranquilidade das familias.

Formoso considerou que o programa mellora a calidade de vida de miles de persoas e permite que toda a cidadanía teña acceso a servizos sociais profesionais, independentemente do lugar onde residan.

Axuda a domicilio

O orzamento dedicado a este programa permitirá reforzar os servizos de axuda no fogar dos municipios, cuxa demanda se incrementou notablemente nos últimos anos. A Deputación prevé financiar en 2023 un total de 411.000 horas deste servizo a un prezo de 12€ a hora, unha prestación esencial para a atención de maiores e dependentes nos pequenos concellos.

A cifra supón un incremento de 24.000 horas con respecto a este ano e 144.000 horas máis que en 2020.

En 2023, a Deputación da Coruña financiará 74.541 horas de SAF nos concellos da comarca da Coruña e As Mariñas, 50.971 nos do Barbanza, 81.535 nos de Bergantiños e Costa da Morte, 109.415 nos da área de Ferrolterra, Eume e Ortegal e 94.557 nos de Santiago.

O programa financia a contratación de 179 profesionais do eido social

O programa de servizos sociais tamén permitirá a contratación de 179 profesionais especialistas do eido social. Persoal que cada día atende a miles de cidadáns, que con frecuencia pertencen a colectivos especialmente vulnerables: infancia, mulleres vítimas de violencia, persoas con especiais dificultades de inserción laboral, maiores sen recursos, persoas sen fogar ou con discapacidade.

O programa financia o 100% do salario das persoas contratadas como persoal administrativo (18.000 €/ano), persoal técnico A2 (22.000 €) e persoal técnico A1 (26.000 €). O persoal poderá ser contratado tamén a media xornada.

Prevese a contratación de 40 profesionais nos concellos de menos de 20.000 habitantes da comarca da Coruña, 21 na comarca do Barbanza, 35 na de Bergantiños-Costa da Morte, 35 nos concellos de Ferrolterra, Eume e Ortegal e 48 na comarca de Compostela.