As Pontes acolle este sábado a final do ‘II Circuíto de piragüismo Deputación da Coruña’
Nesta derradeira regata, celebrada no lago pontés, participarán 300 deportistas de 10 clubs da provincia
Este sábado, 9 de setembro, celebrarase nas Pontes a última proba do 'II Circuíto de piragüismo Deputación da Coruña', tras as cinco anteriores realizadas en Rianxo, Pontedeume, Ames, Miño e Outes.
Nesta derradeira regata participarán deportistas das categorías prebenxamín, benxamín e alevín, que competirán en 1.500 metros; e infantil e cadete, que se enfrontarán en 3.000 metros.
A proba, que terá lugar no lago pontés, contará coa participación de 300 deportistas de 10 clubs da provincia.
Haberá un total de oito saídas, realizarase a primeira ás 10:30 horas e a última ás 13:20 horas. Ao remate da competición, entregaranse os trofeos aos deportistas e clubs vencedores.