A Deputación destaca o traballo das ONG coruñesas para mellorar a saúde, a educación e a calidade de vida en distintos puntos do mundo
Rosa Ana García recibiu a representantes da ONG Taller de Solidariedade, que explicaron o proxecto que desenvolven en Bolivia coa colaboración da Deputación
A deputada de Industria, Empresa, Medio Ambiente, Emprego e Política Demográfica, Rosa Ana García López, acompañada de persoal técnico do Servizo de Desenvolvemento Territorial, reuniuse onte con representantes da Fundación Taller de Solidariedade, unha entidade sen ánimo de lucro que empodera a mulleres e colectivos vulnerables a loitar pola igualdade no mundo.
O motivo da visita foi para presentar os resultados do proxecto do Centro para as Mulleres de Alto Litoral -UsphaUspha, Cochabamba, Bolivia. Este centro ven recibindo financiamento por parte da Deputación da Coruña dende o ano 2020. Na reunión estiveron presentes Rafael Veiga de Diego, da Fundación Taller de Solidariedade, dúas representantes do proxecto: a técnica deste, Liliana Siles, e unha destinataria, a emprendedora Lourdes Herrera.
A deputada destacou o traballo das ONG como Taller de Solidariedade para "mellorar a saúde, a educación e as condicións de vida de moitas persoas en diversos países do mundo". A Deputación financia estas actuacións de cooperación internacional cunha liña de subvencións de 300.000 euros ao ano.
