O Premio Rosalía de Castro volve recoñecer a promoción e dignificación do patrimonio lingüístico galego
O prazo para presentar candidaturas estará aberto ata o 30 de abril
Concederá 5.000 euros aos gañadores de cada unha das tres categorías: persoa, entidade e proxecto de dinamización lingüística orientado á infancia e a mocidade
Ata o 30 de abril estará aberto o prazo para presentar candidaturas ao XV Premio Rosalía de Castro de lingua, co que a Deputación da Coruña quere honrar a memoria da maior poeta das letras galegas e recoñecer iniciativas, traballos recentes, traxectorias de persoas, colectivos ou entidades comprometidas coa promoción e dignificación social do patrimonio lingüístico de Galicia, o mesmo no ámbito da provincia que no de toda a comunidade.
Categorías
Establécense tres categorías, cada unha dotada con 5.000 euros:
- Premio á persoa que máis destaque na promoción da lingua galega de calidade e cunha identidade propia e unhas características xenuínas para empregala en todos os ambientes e con todos os estratos sociais.
- Premio á entidade que máis destaque na promoción da lingua galega.
- Premio ao proxecto concreto (ferramentas, publicacións ou coleccións, portais web, etc.) de dinamización lingüística que realice un traballo específico cos tramos da poboación de menor idade, infancia e mocidade e que atenda espazos emerxentes de uso da lingua co obxectivo de premiar a innovación e o futuro.
As bases están publicadas no BOP do 21 de febreiro, e as candidaturas deberanse presentar de xeito telemático, a través da plataforma de tramitación electrónica da Deputación (SUBTEL).
A decisión do xurado darase a coñecer, na segunda metade do mes de maio, na páxina web da Deputación e nos medios de comunicación.
Gañadores do 2023
Daniel Romero, xestor de actividades culturais e de normalización lingüística do Concello de Fene, na categoría A; o Museo do Pobo Galego e o portal web Orgullo Galego, na categoría B; e o músico e animador para público infantil Francisco Manuel Cerdeira, "Pakolas", foron en 2023 os gañadores dun certame que premiou, en anteriores edicións, a María Canosa, a Asociación de Escritoras e Escritores en Lingua Galega, o Proxecto Brazolinda, Xaquín Marín, Agrupación Astronómica Coruñesa ÍO, Twitter en galego, Xabier P. Docampo e Mesa pola Normalización Lingüística, entre outros.