O Festival Noroeste Estrella Galicia volve encher de música a cidade da Coruña co apoio da Deputación
Valentín González Formoso destacou que o evento "é unha referencia musical e cultural" e destaca o apoio provincial a festivais como o Nororeste, o Festival de La Luz ou o da Música Celta de Ortigueira
O Festival Noroeste Estrella Galicia volverá a encher de música a cidade da Coruña entre o 5 e o 11 de agosto. Será o máis longo da súa historia e conta co patrocinio da Deputación da Coruña.
O cartel deste ano foi presentado esta mañá no Castelo de San Antón, nun acto que contou coa participación do presidente da Deputación, Valentín González Formoso, o vicepresidente, Xosé Regueira, a alcaldesa da Coruña, Inés Rey, o director da Axencia Turismo de Galicia, Xosé Merelles; o director corporativo de Hijos de Rivera, Antonio Viejo, o humorista Xosé A. Touriñán e Xanma Louro e Xaquín Martínez, de The Rapants.
Crystal Fighters, Vetusta Morla, Xoel López, The Rapants, Fillas de Cassandra e Triángulo de Amor Bizarro actuarán na praia de Riazor; Travis Birds e Martha High na praza de Azcárraga; Martin Kohlstedt no Castelo de Santo Antón e Salif Keïta, Chambao e Lura no parque de Santa Margarida. Completan o cartel BCUC, Caamaño&Ameixeiras, Garufa Blue Devils Big Band, Hormigonera, Ife Ogunjobi, Imägo, Kamikaze Helmets, Lapido, Lemot, Leticia Rey Quintet, Meu, Patax, Repion, Soul Teller, Terrae, Tiburona, Trío da Kali, Virginia Red, Zålomon Grass e Zënzar. Os concertos celebraranse de mércores a sábado no parque de Santa Margarita, Campo da Leña, praza de Azcárraga, Castelo de Santo Antón e a praia de Riazor. Todos os concertos son de balde.
Formoso destacou que o Noroeste "é unha referencia musical e cultural, un clásico do verán coruñés que achega a mellor música nacional e internacional a distintos puntos emblemáticos da cidade" durante o mes de agosto e puxo de manifesto apoio que a institución provincial presta a este evento e a outros festivais populares da provincia como o Festival da Luz en Boimorto ou o Festival do Mundo Celta de Ortigueira.
"Estamos ante unha edición moi especial do Noroeste, que se renova sen perder a súa esencia e ofrece á cidadanía máis de 50 espectáculos", sinalou a alcaldesa, Inés Rey. A rexedora destacou a enorme aposta polas bandas galegas e en galego que se está a facer e que este ano levarán á praia de Riazor a Fillas de Cassandra e The Rapans. "Como xa veñen facendo outros festivais, este ano quixemos ir máis alá da música e estreamos dúas novas seccións que contarán con artistas da talla de Xosé A. Touriñán", apuntou Inés Rey.
Este ano, como principal novidade, desenvolveranse actividades de artes escénicas como 'Contos ao Noroeste' e 'Noroestiño', para as que se recuperaron espazos emblemáticos da Coruña como a praza de Pontevedra, praza de Vigo, praza do Humor, a praza das Bárbaras ou os Xardíns de Méndez Núñez. 'Contos do Noroeste' serán espectáculos de humor conducidos por Avelino González, Roi da Costa, Bea Campos, Pepo Suevos, Atenea García, Leti da Taberna, Celso Sanmartín, Marita Martínez, Xosé Antonio Touriñán, David Perdomo, Carlos Blanco e Lucía Veiga. O 'Noroestiño', enfocado a público familiar, protagonizarano Vero Rilo, Luis Iglesias, Cé Orquestra, Paco Cerdeira, Paco Nogueiras, Os Monifates, Fran Amil e Magín Blanco.
A 37ª edición é unha clara aposta por facer accesible o programa a un amplo rango de idades, pero tamén polos valores, polo talento local e tamén polas voces femininas. Fillas de Cassandra, Caamaño&Ameixeiras, Lura, Chambao, Tiburona, Repion, Triángulo de Amor Bizarro, Imägo, Travis Birds, Martha High, Leticia Rey e Trío da Kali son o vivo exemplo diso.
A nivel internacional, destaca a presenza de BCUC (Sudáfrica), Lura (Cabo Verde), Salif Keïta (Mali), Soul Teller (Reino Unido), Ife Ogunjobi (Reino Unido), Martha High (Estados Unidos) e Trío da Kali (Mali). Poderán escoitarse músicas de estilos tan diferentes como o clásico, indie, garage, flamenco, bluegrass, soul, funk, new wave, bossa nova, e evidentemente, como non podería ser doutra maneira, o pop-rock, a esencia do Festival Noroeste Estrella Galicia.
Por terceiro ano consecutivo, celebrarase o Mercado de Discos do Noroeste, cuxo obxectivo continúa sendo a de establecer un punto de encontro musical na Coruña musical onde se reúnan coleccionistas, expositores, selos e distribuidoras de soportes fonográficos (vinilos, CD...) con acceso libre para todos os públicos durante os días 11, 12 e 13 de agosto. Estará comandado un ano máis por Nonito Pereira e será precisamente na súa tenda da Rúa Real onde se celebre este encontro, que xa vai pola III edición. O venres de 17:00 a 20:00 horas; sábado e domingo de 11:00 a 20:00 horas.
