A Deputación felicita a Fátima Ameneiro e Edgar Vigo, da escudería Scratch Fene, polos seus éxitos deportivos internacionais
Ameneiro, campioa da FIA European Rally Trophy, e Vigo, subcampión por segundo ano consecutivo, foron recibidos na Deputación polo presidente, Valentín González Formoso, e o deputado de Deportes, Antonio Leira.
O presidente da Deputación da Coruña, Valentín González Formoso, e o deputado de Deportes, Antonio Leira, recibiron esta mañá na sede da institución provincial a Fátima Ameneiro e Edgar Vigo, da escudería Scratch de Fene.
Fátima Ameneiro vén de recoller en Kigali (Ruanda) o trofeo que a acredita como campioa do FIA European Rally Trophy para copilotos, mentres que o piloto Edgar Vigo proclamouse subcampión de Europa por segundo ano consecutivo.
O presidente da Deputación felicitou aos deportistas feneses por estes hitos deportivos, "un recoñecemento a moitos anos de esforzo, dedicación e traballo constante". Conseguir este galardón para a provincia da Coruña é tamén "unha mensaxe de que é posible alcanzar as metas que nos propoñamos, por máis altas que parezan, toda unha inspiración para as novas xeracións de deportistas", afirmou.
Formoso destacou "o orgullo" que supón para a provincia da Coruña contar con deportistas que compiten ao máis alto nivel internacional e desexoulles que continúen os seus éxitos deportivos.
Pola súa banda, os deportistas feneses agradeceron o apoio dos seus sponsors, patrocinadores e afección, así como de institucións como a Deputación da Coruña, que tamén os apoia a través das súas liñas de subvencións de Deportes.