Cultura e Igualdade da Deputación presentan, en colaboración coa Biblioteca Provincial, dous clubs de lectura dixital sobre feminismo e LGTBI
A Biblioteca Provincial acolleu esta mañá a presentación da iniciativa, na que participaron as deputadas de cultura e igualdade, Natividade González e Soledad Agra, acompañadas da xefa de servizo da biblioteca, María Lema, e as moderadoras dos clubs, Nuria Vil e Maitane Vicente
"Páxinas de orgullo" e "Tinta e Equidade" son os nomes dos clubs, moderados por Nuria Vil e Maitane Vicente, respectivamente, aos que se pode acceder tras darse de alta na plataforma dixital eBibioDaCoruna
As áreas de igualdade e cultura da Deputación presentaron esta mañá, en colaboración coa Biblioteca Provincial, dous clubs de lectura dixital sobre feminismo e LGTBI. As deputadas Soledad Agra e Natividade González explicaron o proxecto, acompañadas da xefa de servizo da biblioteca, María Lema, e as moderadoras dos clubs, Nuria Vil e Maitane Vicente.
"Páxinas de orgullo" e "Tinta e Equidade" son os nomes dos clubs, moderados por Nuria Vil e Maitane, respectivamente, aos que se poden acceder desde a plataforma de préstamo dixital eBiblioDaCoruna, cubrindo o formulario da web https://dacoruna.gal/biblioteca/ebibliodacoruna/. Para participar, é preciso estar de alta na plataforma e, dende alí, acceder ás dúas salas onde se atoparán as lecturas propostas polas moderadoras, así como foros para cada unha, reunións telemáticas ou encontros cos autores e autoras nalgúns casos.
A xefa do servizo de biblioteca, María Lema, dou á benvida e agradeceu a colaboración das dúas áreas, así como a "boa acollida" da proposta, "innovadora" xa que, afirmou "non hai ningunha así en toda Galicia".
A deputada de cultura, Natividade González, puxo en valor a Biblioteca Provincial da Deputación da Coruña, "un espazo que é xa referencia na nosa provincia non só como centro de coñecemento e lectura, senón tamén como punto de encontro para a reflexión e o compromiso coa cultura pública, accesible e plural", sinalou. Ademais, expresou o seu "orgullo" pola posta en marcha deste proxecto, "un novo paso no camiño que vimos percorrendo para achegar a lectura a todas as persoas, adaptándonos aos novos tempos e intereses". González explicou tamén os obxectivos destes dous novos clubs dixitais: "crear comunidade arredor da lectura, xerar espazos de diálogo, visibilizar, escoitar, e tamén aprender xuntas e xuntos"
Pola súa banda, a deputada de igualdade, Soledad Agra, convidou a toda a provincia "a participar nestes lugares de encontro e reflexión, onde compartir experiencias". "Os libros, as historias, ofrécennos outras miradas, outras maneiras de chegar, de facer comunidade", engadiu. A deputada tamén salientou o labor das moderadoras,"é fundamental contar cunha persoa experta que nos guíe, e contribúa á apreciar detalles e aspectos diferentes de cada lectura".
Maitane Vicente, moderadora de "Tinta e equidade", resaltou a "oportunidade" que supón esta iniciativa, xa que "nun club de lectura podes aprender, intercambiar, coñecer..." e afirmou que, precisamente, a libraría é "un traballo social". Nuria Vil, de "Páxinas de orgullo", falou da "necesidade" de contar con clubs de lectura como "sitios de encontro, que hoxe en día son ata revolucionarios". No seu caso, sinalou que as lecturas van estar enfocadas no LGTBI "que non está á marxe", polo que ofrece "un sitio amable e distendido, abandonando a ficción cruel do colectivo para ofrecer outras miradas, tamén de autores galegos". Trátase, expresou, "de chamar á reflexión e a pasalo ben".
