A Deputación da Coruña edita un libro sobre Isaac Díaz Pardo en colaboración coa Real Academia Galega de Belas Artes
O libro recolle o discurso pronunciado onte por Xosé Díaz Arias de Castro, fillo do artista, no acto institucional do Día das Artes Galegas e imaxes da súa vida e obra
A Deputación da Coruña, en colaboración coa Real Academia Galega de Belas Artes, vén de editar un libro dedicado á figura de Isaac Díaz Pardo, unha das personalidades máis destacadas da cultura galega do século XX. A publicación coincide coa conmemoración do Día das Artes Galegas 2025, que este ano está dedicado ao artista, intelectual e empresario.
Díaz Pardo, que foi bolseiro da Deputación da Coruña nos seus anos de formación, destacou ao longo da súa traxectoria pola súa contribución á recuperación e modernización das artes plásticas e a industria cultural en Galicia. A súa labor abarcou dende a pintura e o deseño ata a cerámica, sendo un dos grandes impulsores da Fábrica de Sargadelos e do Laboratorio de Formas, proxectos que combinaban innovación, memoria histórica e identidade cultural.
A nova publicación recolle o emotivo discurso pronunciado onte no Teatro Principal de Compostela por Xosé Díaz Arias de Castro, fillo do artista, durante o acto institucional de celebración do Día das Artes Galegas baixo o título "Isaac Díaz Pardo ou as formas que xorden da memoria".
O presidente da Deputación da Coruña, Valentín González Formoso, destacou o vínculo de Díaz Pardo coa institución provincial que lle outorgou a súa primeira beca que lle permitiu completar a súa formación na prestixiosa Escola de Belas Artes de San Fernando, en Madrid. "Algo que nos enche de orgullo e que seguimos facendo hoxe para apoiar ás mozas e mozos da provincia que comezan as súas carreiras artísticas".
Formoso destaca no prólogo do libro a importancia de poñer en valor a traxectoria de Díaz Pardo, "que foi moito máis que un artista, foi un humanista comprometido co seu tempo, un intelectual que fixo da súa obra un vínculo para a memoria, a identidade e o progreso económico e cultural do noso país". "Con esta publicación queremos renderlle unha merecida homenaxe", apuntou o presidente provincial.
O libro estará dispoñible para o público a través das canles institucionais da Real Academia Galega de Belas Artes. A Deputación distribuirá exemplares ás bibliotecas municipais da provincia, facilitando o acceso a un legado fundamental para a historia recente de Galicia.