Formoso visita o novo local de ASPANAES na cidade da Coruña, financiado pola Deputación para prestar apoio a unhas 260 familias da área

O presidente da Deputación da Coruña, Valentín González Formoso, e a deputada de Política Social, Mar García Vidal, visitaron hoxe mércores, 2 de abril, Día Mundial de Concienciación sobre o Autismo, as obras de reforma da nova sede de ASPANAES na cidade Coruña.

O local, ubicado no entrechán da Torre Helios, no entorno do centro comercial Espacio Coruña, conta con 510 metros cuadrados e foi adquirido pola entidade cun investimento de 326.700 euros, dos que o 80% (261.360 €) foron achegados pola Deputación da Coruña.

Acompañados da vicepresidenta de ASPANAES, Mercedes Fernández Angulo, a vogal Ivonne Pose Gabín, o director xerente, Daniel Viéitez, a presidenta da Fundación Autismo Coruña, María José Álvarez Folgar, e o arquitecto responsable da reforma, Eusebio Chao Carreiras, o presidente e a deputada visitaron o local, supervisaron unha recreación virtual de cómo quedará o espazo tras as obras e interesáronse polos servizos que desde alí se prestarán aos usuarios.

"El local se dedicará a atención temprana, estrategias psicoeducativas y habilidades psicosociales y trasaladaremos toda la parte de administración aquí porque al ir creciendo tan rápido no teníamos espacio suficiente", explicou a vicepresidenta dde Aspanaes, que sinalou que prevé que as obras de reforma podan estar concluídas en setembro.

Mercedes Álvarez destacou que Aspanaes conta actualmente cuns 700 usuarios en todos os seus servizos e que este novo local prestarase atención específica a unhas 260 persoas con Trastorno do Espectro Autista (TEA) e ás súas familias que compoñen a rede da entidade nas comarcas da Coruña, Betanzos e Bergantiños.

Pola súa banda, Valentín González Formoso destacou que este investimento da Deputación permitirá "dar cobertura e apoio nas súas necesidades a un colectivo que medra como é o das persoas con TEA" e lembrou que unha de cada 89 persoas son diagnosticadas son trastornos do espectro autista "polo que todo o apoio que podamos prestar desde as administracións é importante, aínda que non teñamos as competencias".

"Colaboramos na compra deste local, que se adapta ás necesidades da entidade tanto opor ubicación como por espazo, e que cremos que reúne unhas condicións óptimas para que esas terapias dean o mellor resultado", apuntou o presidente, que incidiu na necesidade de seguir apostando pola inclusión e dotando de recursos a entidades como Aspanaes que traballan por ela "nun día tan sinalado coma hoxe e os 365 días do ano".

Desde a súa nova sede, Aspanaes ofrecerá servizos co obxectivo de mellorar a autonomía das persoas con TEA. Dentro das súas propostas están iniciativas como atención temperá (de cero a 6 anos), deseño de estratexias psicoeducativas para menores de 7 a 16 anos ou servizo de habilidades persoais e sociais. Para prestar estes servizos, a entidade dispón dun grupo de traballadoras e traballadores interdisciplinare composto por 14 profesionais de psicoloxía, psicopedagoxía, logopedia, terapia ocupacional e educación social.

A asociación ASPANAES é unha das 273 entidades sociais que cada ano contan co apoio económico da Deputación. Nos últimos anos, a Deputación da Coruña contribuíu a financiar programas e terapias de fomento da autonomía persoal das persoas con TEA, a acondicionar, amoblar de dotar de material informático ao novo centro de ASPANAES no Monte do Gozo (Santiago) ou a adaptar as súas instalacións en Ferrol. Nos últimos meses, a Deputación entregou tamén á entidade un vehículo adaptado para o transporte dos seus usuarios.

A provincia da Coruña supón o 67,74% da área de influencia de ASPANAES, que presta atención a centos de persoas con TEA e as súas familias.