O SICTED recoñece a calidade turística de 131 empresas e servizos de Santiago
As distincións do programa co que colabora a Deputación da Coruña entregáronse na Casa das Asociacións de Cornes, nun acto no que participou o deputado de Patrimonio, Xosé Penas
"Na Deputación apostamos por accións que fomenten o traballo no turismo como elemento diferenciador, buscando un perfil afastado da idea simplista do turismo de masas e apostando pola integración cultural, económica, social e patrimonial", afirmou Penas
O Sistema Integral de Calidade Turística Española en Destino (SICTED) –un programa de mellora da calidade dos destinos turísticos promovido pola Secretaría de Estado de Turismo e co que colabora a Deputación da Coruña– entregou na Casa das Asociacións de Cornes compostelá a súa marca de distinción a 131 empresas e servizos de Santiago. No acto participaron o deputado de Patrimonio, Xosé Penas, en representación do departamento provincial de Turismo; a concelleira e a xerente de Turismo de Santiago, Míriam Louzao e Flavia Ramil, e o presidente da Asociación Profesional de Guías de Turismo de Galicia, Joaquín Rubal.
As distincións concedidas son cinco máis ca o ano pasado e superan o dobre das 60 que se outorgaron en 2018, cando se recuperou o traballo neste sistema de avaliación. No destino santiagués, a Mesa de Calidade do SICTED ten como membros ao Concello de Santiago, a Cámara de Comercio, a área de Calidade de Turismo de Galicia, Compostela Monumental, o Santiago de Compostela Convention Bureau, a Asociación de Axencias de Viaxe de Galicia, Hostalaría.gal e Unión Hotelera.
"Falar de turismo e da excelencia e da calidade no eido turístico", dixo Penas na súa intervención, "é algo sumamente transversal, e por iso na área de Patrimonio da Deputación sempre apostamos pola combinación no traballo e na xestión turística dende o punto de vista da propia excelencia e do respecto polo patrimonio e a cultura en xeral". Para o deputado, esa aposta reflíctese "en accións que fomenten o traballo no turismo como elemento diferenciador, buscando un perfil afastado da idea simplista do turismo de masas e apoiando accións a prol da integración cultural, económica, social e patrimonial".
O deputado quixo "agradecer e sobre todo parabenizar o traballo que neste eido se fai dende administracións coma o Concello de Compostela, Turismo de Santiago ou a propia Deputación da Coruña; traballo que sen dúbida non sería nada sen todo o tecido sectorial que estades detrás do esforzo e labor nun sector altamente complicado e moitas veces prexulgado, sector que tedes un compromiso demostrado co territorio e coa xeración dunha economía social e integradora".
Segundo Míriam Louzao, "a calidade é unha ferramenta necesaria para desenvolver un novo modelo turístico na cidade, que aposte máis polo valor engadido que polas meras cifras". "Neste sentido", engadiu, "se queremos continuar posicionándonos como un destino global de calidade, precisamos contar cunha oferta de calidade".
