Clubs de lectura en igualdade e diversidade sexual
A Biblioteca en colaboración coa área de Igualdade presentan dous clubs dixitais de lectura que comezan o luns 7 de abril.
Engadidos aos dous clubs dixitais que xa están en funcionamento desde fai anos (Arredor dos libros e Compartiendo lecturas) estes novos clubs teñen como obxectivo xerar espazos seguros onde compartir reflexións sobre as materias de igualdade de xénero e diversidade sexual, achegándose ao conxunto da poboación da provincia, viva onde viva e teña a idade que teña. Están dispoñibles na eBiblioDaCoruna, a biblioteca dixital para todas as persoas socias de bibliotecas municipais da provincia e da propia Deputación.
Como darte de alta?
- Faite socio/a da túa biblioteca municipal ou da Biblioteca da Deputación (neste caso, tes a información aquí).
- Date de alta na eBiblioDaCoruna: enche o formulario que atoparás aquí e agarda a que che enviemos unha mensaxe ao teu correo electrónico cunha ligazón, a través da cal podes establecer o teu contrasinal.
- Entra na eBiblioDaCoruna aquí e identifícate co teu usuario (que é o teu correo electrónico) e o contrasinal. Tamén podes descargar a app dispoñible para Android, iOS e Huawei.
- No menú da eBiblioDaCoruna (tanto na versión web como na app) atoparás o acceso a "Club de lectura e espazo de aprendizaxe". Preme nel.
- Elixe o club no que queres entrar de entre os dispoñibles e preme en "Comeza a experiencia". A partir dese momento xa podes participar no club, ler o libro, comentar, compartir citas, etc. Acceso directo a Tinta e equidade premendo aquí; e acceso directo a Páxinas de orgullo premendo aquí.
En que consisten os clubs?
Club de lecturas en igualdade: Tinta e equidade
Tinta e equidade é un club dixital de lecturas en igualdade de xénero que ten o obxectivo específico de promover entre a poboación un pensamento crítico sobre as desigualdades de xénero e crear un espazo de encontro para fomentar o diálogo e a reflexión sobre a igualdade a través de libros e historias. Un lugar para compartir ideas, aprender e inspirar cambios positivos na sociedade. Está moderado por Maitane Vicente Mariño, Traballadora social e libreira social.
Para máis información preme aquí.
Club de lecturas de diversidade sexual: Páxinas de orgullo
Páxinas de orgullo é un club dixital especializado en lecturas LGTBiQ+ co obxectivo de visibilizar a importancia da tolerancia e a igualdade das persoas, independentemente da súa orientación sexual e identidade de xénero, e co propósito de normalizar e sensibilizar á sociedade sobre as diversidades sexuais. Está moderado por Nuria Vilán, Grao en estudos de Galego e Español.
Para máis información preme aquí.
