Rianxo celebrará o sábado 5 a “Xornada de Honra das Madriñas Republicanas”
A Casa do Concello acolleu esta mañá a presentación do acto, organizado pola área de Dereitos Civís da Deputación e a Comisión pola Recuperación da Memoria Histórica da Barbanza, en colaboración co Concello de Rianxo
Na presentación desta mañá participaron a deputada de dereitos civís, Soledad Agra; o alcalde de Rianxo, Julián Bustelo, e o presidente da Comisión pola Recuperación da Memoria Histórica da Barbanza, Carlos Cimadevila
"Cada vez é máis necesario lembrar, homenaxear e dar a coñecer estas situacións ante os discursos políticos que as invisibilizan, pois recordar a nosa historia é recordar os sufrimentos que nos traen as guerras, onde se perseguiron ademais a persoas que defendían dereitos dos que agora podemos desfrutar"sinalou a deputada de dereitos civís, Soledad Agra
O antigo campo de concentración de Rianxo converterase, este sábado 5 de abril, no escenario de homenaxe ás Madriñas Republicanas, coa celebración dunha xornada na súa honra organizada pola área de dereitos civís da Deputación e a Comisión pola Recuperación da Memoria Histórica. Así o anunciaron esta mañá a deputada de dereitos civís, Soledad Agra, o alcalde de Rianxo, Julián Bustelo, e o presidente da Comisión pola Recuperación da Memoria Histórica da Barbanza, Carlos Cimadevila.
O acto comezará ás 11:00 horas no antigo campo de concentración de Rianxo coa inauguración dun busto en honra de Dolores Rodríguez Sende, madriña do campo de concentración de Rianxo. Posteriormente, ás 12:00 a xornada trasladarase ao auditorio de Rianxo, onde terá lugar un relatorio e mesa redonda sobre o papel das mulleres durante a Guerra Civil, o franquismo e a transición coa participación das investigadoras Aurora Marco, Montse Fajardo e María Fernández, expertas en memoria histórica e na loita das mulleres durante a ditadura. E, para rematar, desenvolveranse as actuacións de Bernal Muíños e do grupo Barahúnda, que poñerán música á memoria e á resistencia, achegando emoción e sensibilidade a este acto de homenaxe organizado pola Deputación da Coruña e a Comisión pola Recuperación da Memoria Histórica da Barbanza, coa colaboración do Concello de Rianxo, Nova Escola Galega, O Faiado da Memoria e a Asociación Cultural Barbantia.
Durante a súa intervención, a deputada de dereitos civís, Soledad Agra, explicou o obxectivo do proxecto: "poñer en valor o traballo altruísta de moitas mulleres que se acercaban aos campos de concentración (que os había nesta provincia) que se puxeron en marcha na guerra civil e se mantiveron en moitos casos durante a ditadura". Trátase dun recoñecemento "á solidariedade de veciños e veciñas que apoiaban aos presos, levándolles comida, lavándolles a roupa, facéndolles compañía...". Agra apuntou que "é necesario recordar, homenaxear e dar a coñecer estas situacións cada vez máis ante os discursos políticos que as invisibilizan, pois recordar a nosa historia é recordar os sufrimentos que nos traen as guerras, onde se perseguiron ademais a persoas que defendían dereitos dos que agora podemos desfrutar". E, engadiu, "calquera acto de recuperación daquel sufrimento contribúe á paz e a concordia, para combater os discursos de odio que nos fan volver a tempos escuros".
O alcalde, Julián Bustelo, referiuse á "axuda mutua constituída por veciñas do entorno que como boamente podían axudaban aos presos do campo de concentración, todos traballadores que por razóns políticas estaban aí, a pesar de que non tiñan ningunha relación, eran descoñecidos". "Esta rede de mulleres", engadiu, "merece este recoñecemento".
Pola súa parte, o presidente da Comisión pola Recuperación da Memoria Histórica da Barbanza, Carlos Cimadevila, agradeceu ás dúas institucións "o traballo e a colaboración", para levar a cabo esta xornada na que se "inaugurará un busto de Dolores Rodríguez Sende, obra do escultor Ricardo Dávila, que foi madriña republicana con tan so 5 anos", explicou, e salientou a "importancia" de "manter viva a memoria destas mulleres, das súas accións e recoñecer o seu papel social". Cimadevilla convidou á veciñanza a participar "neste acto de lembranza e recoñecemento para manter viva a memoria de quen loitou pola dignidade e a liberdade".