A Deputación apoia á asociación de veciños Río Samo de Frades na mellora de infraestruturas no rural

A deputada de Mar e Medio Rural da Deputación da Coruña, Cristina Capelán, visitou a asociación de veciños Río Samo no concello de Frades, onde mantivo unha reunión coa directiva da entidade para coñecer de primeira man as súa necesidades e proxectos. Na reunión participaron o presidente da entidade, José María Vieites, o vicepresidente, José García, e o tesoureiro, José Suárez. 

Durante a visita, Capelán destacou a importancia das subvencións de promoción económica impulsadas pola Deputación para a mellora das infraestruturas no rural. A través desta liña de axudas, a asociación Río Samo recibiu nos últimos anos apoio económico para diversas melloras, como a construción do peche da pista multiusos situada detrás da súa sede, infraestrutura que xa fora financiada anteriormente con fondos da Deputación.

Ademais, as axudas permitiron acometer proxectos como a conservación do palco da música, melloras no parque infantil, no aparcadoiro e na área recreativa da Fraga do Petón, contribuíndo así á dinamización e á mellora da calidade de vida da veciñanza.

A deputada subliñou o compromiso da Deputación da Coruña co desenvolvemento do rural, apostando por investimentos que reforcen o tecido asociativo e melloren os servizos e infraestruturas dos municipios da provincia.

"Estas axudas son fundamentais para garantir que as entidades veciñais conten con espazos axeitados para o seu funcionamento e para ofrecer mellores servizos e actividades á súa comunidade", afirmou Cristina Capelán.

A visita rematou cun percorrido polas instalacións renovadas, onde a directiva da asociación agradeceu o apoio da Deputación e trasladou novas propostas de mellora para o futuro, entre elas a dotación de novo mobiliario urbano para dotarse dunha área recreativa.