A Deputación levou á Coruña a semifinal do concurso cociñeiro/a e camareiro/a do ano 2025
A cidade herculina acolleu esta tarde o concurso, que se emprazou no CIFP As Pontes, onde se celebraron as probas dos chefs; e no Árbore da Veira, onde foron as dos camareiros, así como as actividades complementarias e a gala final
A compostelá Sonia García foi a primeira finalista na categoría de camareira do ano; mentres a primeira finalista cociñeira foi Taigoro Suzuki (Restaurante i + T Salamanca)
O vicepresidente, Xosé Regueira, encabezou a mesa redonda sobre o "Impacto do turismo gastronómico no territorio" e participou tamén na entrega de premios aos finalistas nas dúas categorías
A Coruña converteuse esta tarde na capital da gastronomía coa celebración da semifinal 2025 dos concursos camareiro/a e cociñeiro/a do ano 2025, organizados polo Grupo Caterdata en colaboración coa Deputación. O CIFP As Pontes e o Restaurante Árbore da Veira foron os escenarios nos que se desenvolveron as diferentes probas, así como as mesas redondas e, por suposto, a gala final.
Comezaba a xornada ás 10h, hora na que os camareiros/as encheron o Restaurante Michelín para demostrar as súas habilidades na sala. Simultaneamente, os cociñeiros/as participantes competiron na cociña do CIFP As Pontes para gañarse os padais do xurado, rematando de empratar ao mediodía para convencelos da superioridade das súas receitas. Xurados dos que formaron parte os cociñeiros Iván Domínguez, Luis Veira e Álvaro Victoriano e os profesionais de sala Ana Méndez, Miguel López, Manel Oliveira, Manuel Otero e Alejandro Paadín.
Durante a propia celebración das probas, desenvolvéronse durante todo o día, tamén no Árbore da Veira, diferentes mesas redondas, así como catas e showcookings. Precisamente, xusto antes da celebración da gala, ás 16:30, comezaba a mesa redonda sobre o "impacto do turismo gastronómico no territorio", na que participaron o vicepresidente, Xosé Regueira; a cociñeira de Árbore da Veira, Iria Espinosa e o sumiller e consultor enogastronómico, Alejandro Paadín. Regueira afirmou que A Coruña "é un territorio que merece a pena coñecer so para probar un dos nosos restaurantes" que é valorado pola súa "paisaxe e productos". "Un paisaxe no que aínda vive e traballa xente, capaz de crear produtos locais de primeirísima calidade e de xerar oportunidades no territorio" e, por iso "é importante promover un turismo sostible dende o punto de vista social, económico e medioambiental, para atraer a xente que saiba valorar o que o sector da produción de alimentos é capaz de ofrecer".
Sobre as perspectivas de futuro, Regueira fixo fincapé na necesidade de ser "responsables co territorio, a cultura, a historia e a tradición" para poder "seguir medrando dun xeito sostible e capaz de xerar oportunidades para a poboación". Ademais, sinalou que "o futuro da gastronomía pasa necesariamente pola despensa mariña" e por un consumo e produción de alimentos sustentables en todos os aspectos. Regueira tamén puxo en valor a calidade dos produtos, "que permite que a nosa cociña se sitúe nun lugar privilexiado" e ao propio sector, que se centra na calidade cun estándar de sustentabilidade moi alto" e a importancia dos "centros de formación, dos que saen profesionais que hoxe están despuntando en todo o mundo".
Ás 17h comezaba a gala na que se deron a coñecer os semifinalistas das dúas categorías; unha delas, a compostelá Sonia García, primeira clasificada na categoría de camareira do ano, compartindo podio con Javier Jiménez e Marcos Eire, segundo e terceiro clasificados. Pola súa banda, Taigoro Suzuki (i + T Salamanca); Pola Hemaia (L'Alkimista, Reus) e Jorge Lengua (La Suculenta, Benicàssim) foron os clasificados na categoría de mellor cociñeiro/a do ano. Todos eles recolleron os seus premios das mans do vicepresidente tras unha competición pola que pasaron unha ducia de participantes, tanto polos fogóns do CIFP As Pontes como polas salas de Árbore da Veira para tratar de clasificarse nesta primeira semifinal, que continuará en Alicante cunha segunda e rematará en Alimentaria 2026, onde se decidirá o gañador de cada categoría.
Xosé Regueira valorou moi positivamente o impacto deste evento, "que nos permitiu reunir ao sector, algo que sempre é unha boa oportunidade para sumar, crear sinerxías e poñer en valor todo o que está acontecendo na provincia e no país", sinalou, e "ademais, situar a provincia no epicentro estatal da gastronomía, cun concurso de gran relevancia como este, do que saíron nomes tan icónicos como Luís Veira, Beatriz Sotelo, Iván Domínguez... ". Neste sentido, o vicepresidente sinalou que "a gastronomía é agora mesmo o noso principal destino turístico" e explicou a estratexia da Deputación, que pasar por "apostar pola enogastronomía como principal aliada dun turismo de calidade e non tanto de cantidade, que pon en valor a nosa identidade, lingua e cultura, e que non só é respectuoso coa contorna, senón que ve na nosa forma da vida un dos principais atractivos turísticos do territorio", sinalou.
