A Deputación da Coruña concede 256.518 euros a proxectos de cooperación ao desenvolvemento promovidos por entidades galegas sen ánimo de lucro

A Deputación da Coruña publica hoxe a resolución provisional do programa subvencións a entidades sen ánimo de lucro para a execución de proxectos de investimentos de cooperación internacional en países en vías de desenvolvemento.

A través desta convocatoria, a institución provincial repartirá 265.518 euros entre 10 organizacións, co obxectivo de apoiar actuacións que melloren as condicións de vida de poboacións vulnerables fóra do territorio galego.
As iniciativas seleccionadas abranguen ámbitos como o acceso á auga potable, a mellora do saneamento, a seguridade alimentaria, a igualdade de xénero ou o fortalecemento dos servizos básicos en comunidades rurais de países como Guatemala, Honduras, Ecuador, Chad, Uganda e Guinea Bisau entre outros.

Entre os proxectos subvencionados destaca o presentado por Arquitectura Sen Fronteiras España, que recibirá 32.000 euros para mellorar o sistema de saneamento e hixiene da comunidade Mam Cajolá, en Champerico, Guatemala. Tamén figuran propostas promovidas por entidades como Solidariedade Internacional de Galicia ou a Fundación Galicia Innova.

Con programas como este, a Deputación presta apoio aos axentes da cooperación galega, principalmente aos da provincia da Coruña, financiando proxectos que levan a solidariedade coruñesa arredor do mundo e que melloran a vida de miles de persoas.