As Madriñas Republicanas, “esas mulleres que puxeron humanidade no horror” reciben en Rianxo unha homenaxe da man da Deputación
A deputada de dereitos civís, Soledad Agra; o alcalde de Rianxo, Julián Bustelo; o presidente da Comisión pola Recuperación da Memoria Histórica da Barbanza, Carlos Cimadevila e a madriña, Dolores Rodríguez Sende, participaron esta mañá no acto onde se inaugurou a escultura no antigo campo de concentración
Esta xornada está organizada pola Deputación e a Comisión pola Recuperación da Memoria Histórica da Barbanza, coa colaboración do Concello de Rianxo, Nova Escola Galega, O Faiado da Memoria e a Asociación Cultural Barbantia.
"Cada vez é máis necesario lembrar, homenaxear e dar a coñecer estas situacións ante os discursos políticos que as invisibilizan, pois recordar a nosa historia é recordar os sufrimentos que nos traen as guerras, onde se perseguiron ademais a persoas que defendían dereitos dos que agora podemos desfrutar"sinalou a deputada de dereitos civís, Soledad Agra
"Hoxe estamos aquí para homenaxear a mulleres que puxeron humanidade no horror" comezaba a deputada de dereitos civís, Soledad Agra, durante a súa intervención. "Ante a deshumanización dos homes que empezaron unha guerra para rematar cos dereitos da maioría e coas liberdades conseguidas durante a República, estaban mulleres, como Dona Dolores Rodríguez Sende, que representa nesta escultura a moitas outras por toda Galiza, que demostraron o seu compromiso coa dignidade e coa xustiza".
Iniciábase así unha homenaxe na que participaron, xunto coa deputada, o alcalde de Rianxo, Julián Bustelo; o presidente da Comisión pola Recuperación da Memoria Histórica da Barbanza, Carlos Cimadevila e a madriña, Dolores Rodríguez Sende.
Case un século despois, o antigo campo de concentración de Rianxo pasou a albergar unha escultura, obra de Ricardo Dávila, de Dolores Rodríguez Sende, madriña de guerra en representación de todas esas "mulleres que serviron de consolo e apoio para tantos, para homes que perderon a liberdade e moitos a vida, en campos de concentración que se converteron en campos de exterminio". Por iso, "estamos aquí para recordar e homenaxear, para contar, para louvar, para alegrarnos de ter memoria", engadía Agra, que agradeceu ás madriñas "que foran fortes para aliviar o sufrimento de tantos a risco do propio sufrimento", así como a colaboración ao Concello de Rianxo.
Trala inauguración do busto, a xornada trasladouse ao auditorio, onde tivo lugar un relatorio e mesa redonda sobre o papel das mulleres durante a Guerra Civil, o franquismo e a transición coa participación das investigadoras Aurora Marco, Montse Fajardo e María Fernández, expertas en memoria histórica e na loita das mulleres durante a ditadura. Como peche da homenaxe, Bernal Muíños e o grupo Barahúnda puxeron música á memoria e a resistencia.
