Coruña Estudio Inmersivo (CEI) preséntase en Iberseries como un referente europeo en innovación audiovisual
No marco de Iberseries, que se celebra do 30 de setembro ao 3 de outubro en Matadero Madrid, a Deputación da Coruña e Pedralonga Estudios presentaron hoxe Coruña Estudio Inmersivo (CEI), un dos platós virtuais tecnoloxicamente máis avanzados de Europa.
Baixo o título "Innovación e eficiencia: descubre o futuro da produción de contidos", o encontro contou coa participación de Rosa Ana García, deputada de Emprego, Medio Ambiente e Política Demográfica da Deputación da Coruña; Miguel Ovejero, subdirector de Comunicación Audiovisual do Ministerio para a Transformación Dixital e da Función Pública; Alfonso Blanco, presidente do Clúster Audiovisual Galego; e José Manuel Deus, director xeral de Pedralonga Estudios.
A presentación asistiron máis de medio cento de profesionais do sector audiovisual español, así como produtores de Francia, Alemaña, Estados Unidos e Portugal, ademais de prensa especializada internacional.
Rosa Ana García destacou o CEI como un modelo de colaboración público-privada "que nos sitúa á vangarda da nova xeración de rodaxes inmersivas en Europa e que representa ademais unha gran aposta por un sector estratéxico para Galicia como é o audiovisual. Un sector que non deixa de crecer e reinventarse", afirmou.
A deputada sostivo que o CEI é "un punto de encontro entre a creatividade e a tecnoloxía, que abre novas posibilidades para a industria". "Esperamos que o CEI faga que A Coruña e Galicia acollan novas producións nacionais e internacionais, creando un ecosistema que permite combinar tanto as rodaxes físicas como as virtuais", afirmou.
Coruña Estudio Inmersivo, CEI, está chamado a marcar un fito na produción audiovisual en España pola súa avanzada infraestrutura tecnolóxica. Entre os seus principais atractivos atópase un plató virtual de 750 m² equipado cunha pantalla LED Wall semicircular de 28 metros de ancho por 6 de alto e resolución 4K, que permite optimizar custos e ampliar as posibilidades creativas para producións tanto nacionais como internacionais.
O CEI, situado na Cidade das TIC da Coruña, supuxo un investimento próximo aos nove millóns de euros, financiado pola Deputación da Coruña e Plan de Recuperación do Goberno de España. A xestión do centro está a cargo de Pedralonga Estudios, sociedade creada en 2024 que agrupa ao Clúster Audiovisual Galego, á Universidade da Coruña e a un grupo de dez destacadas empresas audiovisuais galegas.
