A Deputación completa unha senda peonil de máis de 3 quilómetros entre Ares e Redes
O presidente, Valentín González Formoso; o alcalde de Ares, Julio Iglesias, e a deputada de Vías e Obras, Mónica Rodríguez, visitaron hoxe melloras da seguridade viaria en Redes e Chanteiro financiadas pola Deputación con máis de 2,7 millóns de euros
A estrada Ares-Redes conta cun elevado tránsito de vehículos e peóns e as obras supuxeron un investimento de 748.000 euros
O presidente da Deputación da Coruña, Valentín González Formoso, o alcalde de Ares, Julio Iglesias Redondo, e a deputada responsable da área de Vías e Obras, Mónica Rodríguez, acompañados por técnicos do departamento provincial de estradas e concelleiras do goberno municipal visitaron hoxe distintas obras financiadas pola Deputación no municipio, entre elas, a senda peonil que conecta Ares e Redes e a derradeira fase da ampliación e mellora da estrada Ares-Chanteiro.
Formoso e Iglesias percorreron a senda xa completada da estrada provincial DP 0401 que conecta os núcleos de Ares e Redes. Unha senda de algo máis de 3 quilómetros, a maior parte nunha longa recta que permite camiñar con seguridade nas marxes deste vial, que carecía de beiravías.
A Deputación da Coruña investiu 748.038 euros nesta obra, unha cifra á que se suman os 30.850 euros destinados ás expropiacións dos terreos necesarios para acometer o proxecto.
"Estamos nunha obra que era moi demandada e que é froito dun compromiso co alcalde e coa veciñanza, que reivindicaba desde hai tempo unha zona segura para poder camiñar nunha estrada tan transitada coma esta, especialmente no verán, xa que dá acceso a algunhas das principais praias de Ares", afirmou Formoso, que considerou que "esta senda era claramente necesaria e penso que é un acerto tela feito".
Formoso referiuse tamén ás obras da estrada DP 0402 Ares-Chanteiro, que supuxeron un investimento de 1,9 millóns de euros para a mellora integral dos preto de cinco quilómetros deste vial, que incluíron o ancheamento da plataforma e a construción de sendas en ambas marxes da calzada.
"Son obras de grande magnitude, longas no tempo, e que inevitablemente xeran molestias á veciñanza durante a súa execución, pero creo que o esforzo pagou a pena e que hoxe os veciños de Redes e de Chanteiro gozan de estradas máis amplas e seguras e de beirarrúas que permiten circular a pé con absoluta seguridade", apuntou o presidente da Deputación.
Pola súa banda, o alcalde de Ares, Julio Iglesias Redondo, agradeceu o investimento da Deputación para a mellora de ambas as súas estradas, que suma arredor de 2,7 millóns, e que supoñen unha notable mellora da seguridade viaria no municipio.
O alcalde solicitou a colaboración da Deputación para acometer a última fase da estrada de Pedrós, que une Ares con Pedrós e a estrada de Franza.
Preto de 2 millóns en Ares-Chanteiro
Formoso e Iglesias visitaron tamén a estrada DP 0402 Ares-Chanteiro, nas que a Deputación da Coruña investiu 1,9 millóns de euros para ampliar a calzada, construír sendas peonís, glorietas que melloran a seguridade das interseccións, zonas de aparcamento, recollida de pluviais e alumeado.
As obras abarcan un total de 4,7 quilómetros e supuxeron unha importante transformación da estrada, que agora permite unha circulación segura tanto para o tráfico rodado como para os desprazamentos a pé dos veciños e veciñas de Chanteiro.
"A Deputación da Coruña pon a súa capacidade investidora ao dispor dos concellos e en Ares temos un bo exemplo de como estes dous proxectos contribúen de forma moi importante a mellorar a seguridade viaria no municipio", subliñou Formoso.
