O deputado de patrimonio, Xosé L. Penas, visita en Cedeira o Castro Sarridal
Xosé L. Penas asistiu á localidade cedeirense acompañado da deputada provincial, Cristina García Rey, onde se reuniron co alcalde, Pablo Diego Moreda e o tenente alcalde, José Antonio Rodríguez Arribe
Dende a Deputación valoráronse posibles actuacións en materia de patrimonio
O concello de Cedeira acolleu a visita do deputado de patrimonio, Xosé L. Penas, e a deputada provincial Cristina García Rey, que se reuniron co alcalde do municipio, Pablo Diego Moreda, e o tenente alcalde, José Antonio Rodríguez Arribe.
Os deputados, acompañados dos representantes municipais, acudiron ao Castro Sarridal para coñecer en detalle este xacemento arqueolóxico da Idade de Ferro, así como os resultados das sucesivas campañas de escavación executadas e tamén o plan arqueolóxico do concello para seguir avanzando na descuberta de novos achados pola zona adxacente, pola que vai o camiño.
O percorrido abrangueu tamén, na mesma península de Sarridal, as cetarias que se recuperaron recentemente, o miradoiro que está sobre elas e o Castelo da Concepción, elementos que conforman un singular conxunto patrimonial. "O noso patrimonio, coma este Castro de Sarridal forman a base da nosa memoria colectiva, esencial para comprender a nosa historia e saber máis sobre unha época tan relevante como foi a Idade de Ferro, neste caso" apuntou Xosé L. Penas.
Ademais, Deputación e Concello valoraron posibles vías de colaboración dende a área de Patrimonio, para levar a cabo posibles actuacións arredor do Castro Sarridal. "Os traballos de investigación e coidado son fundamentais para a posta en valor non só deste xacemento, senón da nosa identidade, polo que dende a Deputación valoraremos diferentes actuacións neste sentido".
