Edición 2023

XI CONCURSO PALABRAS DE AMOR "#140ENPOSITIVO"

A Biblioteca Provincial da Deputación da Coruña convoca a 11ª décima edición do concurso "Palabras de amor: #140enpositivo"

1. Primeira. Obxecto

O concurso ten como finalidade espertar a imaxinación dos lectores e lectoras, animar a compartir as súas creacións, dinamizar a Biblioteca e facer partícipes do concurso ao conxunto de bibliotecas municipais da provincia.
Buscamos mensaxes positivas que nos impulsen e melloren no noso día a día, palabras de ánimo e apoio para compartir e animar a diferentes idades.

2. Segunda. Participantes

Poderán participar todas as persoas físicas, a partir de 7 anos, escollendo a categoría na que participa.
Quedan excluídas todas as persoas con calquera tipo de relación de servizo coa Biblioteca da Deputación da Coruña.

3. Terceira. Formato

A máxima do concurso é o pensamento positivo, así que os participantes teñen que crear unha mensaxe motivadora, de ánimo, entusiasmo, alegría ou apoio a diferentes causas: unha mensaxe en positivo.
As mensaxes terán unha extensión de 280 caracteres, os espazos contan.
Poden ser escritas en ordenador ou manuscritas.
As mensaxes poden estar escritas en galego ou castelán.
Cada participante poderá entregar ou enviar como máximo 3 mensaxes ou composicións.
As mensaxes deben ser inéditas ou non serán candidatables para os premios.

4. Cuarta. Forma de presentación

Os traballos deben presentarse dun dos dous seguintes xeitos:
- Enviando un correo electrónico a biblioteca.info@dacoruna.gal co asunto #140enpositivo, e especificando a mensaxe e os datos persoais da autoría (nome e apelidos, enderezo postal e número de teléfono) e en que categoría participan (categoría 1 para maiores de 18 anos, categoría 2 entre 12 a 17 anos e categoría 3 entre 7 e 11 anos)
- Escribindo as mensaxes nos modelos en papel dispoñibles na Sección Infantil e Xuvenil da Biblioteca ou no Servizo de Información, e deixándoas nas caixas de correo habilitados nesas salas.

5. Quinta. Prazo de presentación

O prazo no que se pode participar no concurso é do 17 de abril ao 17 de maio de 2023

6. Sexta. Premios

Os premios repártense en dúas categorías:
- Categoría 1: Máis de 18 anos: no que se seleccionarán tres premiados ou premiadas.
- Categoría 2: Entre 12 a 17 anos: no que seleccionarán tres premiados ou premiadas.
- Categoría 3: Entre 7 a 11 anos: no que seleccionarán tres premiados ou premiadas.
De entre todos os traballos presentados seleccionaremos, polo tanto, 9 gañadores ou gañadoras.

O premios consisten en:
- Categoría 1: Máis de 18 anos: no que se seleccionarán tres premiados ou premiadas.
*Un libro electrónico para o primeiro premio.
* 1 tarxeta regalo para a compra de libros valorada en 75 € para o segundo premio.
* un lote de produtos promocionais da biblioteca para o terceiro premio.

- Categoría 2: Entre 12 a 17 anos: no que seleccionarán tres premiados ou premiadas.
*Un libro electrónico ou tableta para o primeiro premio.
* 1 tarxeta regalo para a compra de libros valorada en 75 € para o segundo premio.
* un lote de produtos promocionais da biblioteca para o terceiro premio.

- Categoría 3: Entre 7 a 11 anos: no que seleccionarán tres premiados ou premiadas.
*Un lote de productos de escritura e manualidades para o primeiro premio valorado en 75 €
* 1 tarxeta regalo para a compra de libros valorada en 50 € para o segundo premio.
* un lote de produtos promocionais da biblioteca para o terceiro premio.

Haberá un pequeno agasallo da Biblioteca provincial para todos os participantes.

7. Sétima. Entrega do premio

Finalizado o prazo de participación, anunciaranse os premiados na páxina web da biblioteca, fisicamente na propia Biblioteca, e nas redes sociais Facebook, Twitter e Instagram.
As persoas gañadoras serán notificadas por correo electrónico ou teléfono. Deberán aceptar o premio nun prazo de 72 horas dende a notificación. A aceptación do premio está unida á súa recollida presencial na Biblioteca da Deputación da Coruña.

8. Oitava. Dereitos e deberes

Os traballos presentados e os seus autores expoñeranse na Biblioteca e difundiranse nas redes sociais propias da Biblioteca e tamén nas da Deputación da Coruña, polo que a participación no concurso supón a aceptación da mencionada difusión.
Quedarán excluídas da participación todas aquelas mensaxes que non sexan inéditas, de contido incompleto, inapropiado ou que non se axusten ao obxecto e ás bases do concurso.
A participación neste concurso supón a aceptación completa destas bases, así como a aceptación da decisión do xurado, que será inapelable.
As bases quedarán expostas no taboleiro de anuncios da Biblioteca, na páxina web e nas redes sociais da Biblioteca.

A Coruña, 15 de marzo de 2023

Bases XI Concurso 140enpositivo ed 2023

RESOLUCIÓN DO CONCURSO
ACTA DO XURADO DO XI CONCURSO LITERARIO "PALABRAS DE AMOR" #140ENPOSITIVO

Na Coruña, o 31 de maio de 2023, cando son as 13:00 h, reunímonos os membros do Xurado do XI CONCURSO LITERARIO "PALABRAS DE AMOR" #140ENPOSITIVO, organizado pola Biblioteca Provincial da Deputación da Coruña, formado por Margarita Sanz Páez, Patricia Cernadas Novo, Silvia Conde Regueiro, María Carmen González Rebollido e Ana González Botana; valoramos aspectos como a motivación e positividade que transmite a mensaxe, a claridade na redacción, a orixinalidade, e a calidade literaria:

PRIMEIRO:
Dos traballos presentados na CATEGORÍA 1 (MÁIS DE 18 ANOS)
RESOLVEMOS conceder os premios do XI Concurso Literario "#140enpositivo" ás seguintes mensaxes:

1º PREMIO. CATEGORÍA 1 PERSOAS ADULTAS

"Non deixes nunca de marabillarte,
Non temas mergullar a túa alma
Nun océano de emocións,
Milagre atómico nun universo caótico,
Pois espida e baleira chegaches
Pra vestirte de bágoas i encherte de risos
Neste longo camiño ata as estrelas."

Da que é autora Silvia Nieto Míguez.

2º PREMIO. CATEGORÍA 1 PERSOAS ADULTAS

"A vida é coma unha partida de cartas, e só tes tres opcións: renunciar; deixar o xogo ó azar; ou aceptar as túas cartas, sorrirlle ó teu contrincante e desfrutar a partida coma se fose a única que vas poder xogar."
Da que é autora Estefanía Martínez Varela.

3º PREMIO. CATEGORÍA 1 PERSOAS ADULTAS
"Con determinación e paixón, conquistaremos cada desafío e alcanzaremos novas alturas! O futuro brilla intensamente, prepárate para brillar!"
Da que é autora Alba Vila Paz.

Tamén resolvemos conceder dous accésit ás seguintes mensaxes:

"Deixa que os teus beizos sexan bandeira ondeante de sorrisos e, espalla a mellor vitamina para medrar na vida. Sorrí sen cancelas."
Da que é autora María Arcos Cebreiro.

"Con los años te das cuenta de que lo realmente inefable es ser consciente de que has de ser tú tu mejor cómplice, es entonces cuando tanto la soledad como la compañía llegan a ser tan perfectas que con las mejillas arreboladas piensas: «¡ostras!, ¡qué bonita es la vida!»."
Da que é autora Eva Castro Outeiriño.

SEGUNDO:
Dos traballos presentados na CATEGORÍA 2 (DE 12 A 17 ANOS)
RESOLVEMOS conceder os premios do XI Concurso Literario "#140enpositivo" aos seguintes traballos:

1º PREMIO. CATEGORÍA 2 XUVENIL

"Cada persoa ten unha luz interior que ilumina o mundo. Non deixes que os problemas apaguen esa luz. Deixa que brille sempre, coñece o teu valor e confía nas túas habilidades."

Da que é autora Yanira Albo García.

2º PREMIO. CATEGORÍA 2 XUVENIL
"El tiempo no se puede pausar por eso hay que disfrutar de cada segundo; la alegría como la tristeza, furia o amor están en cada ser humano y todos son necesarios para crecer mentalmente, aprender... la vida hay que vivirla. Pasa página, tienes todo un libro para hacerlo."
Da que é autora Valentina Moure Prego.

3º PREMIO. CATEGORÍA 2 XUVENIL

"Tengo una amiga, una amiga genial. Cuando la veo, se me iluminan los ojos.
Tengo una amiga, una amiga genial. Su sonrisa me alegra los días.
Tengo una amiga, una amiga genial. Siempre me brinda paz.
Tengo una amiga, una amiga genial, y bien orgullosa digo que soy yo misma."

Da que é autora Celia Gómez Pardo.

TERCEIRO:
Dos traballos presentados na CATEGORÍA 3 (DE 7 A 11 ANOS)
RESOLVEMOS conceder os premios do XI Concurso Literario "#140enpositivo" aos seguintes traballos:

1º PREMIO. CATEGORÍA 3 XUVENIL

"As boas persoas somos máis, aínda que as malas fagan máis ruído. Resiste porque venceremos."

Da que é autora Jimena Oubiña Ferreiro.

2º PREMIO. CATEGORÍA 3 XUVENIL

"Si estás aburrido y no sabes qué hacer, lo mejor que puedes experimentar es leer un buen libro."

Da que é autor Raúl Luna del Pozo.

3º PREMIO. CATEGORÍA 3 XUVENIL

"No te preocupes por nada, yo siempre estaré ahí para ayudarte. Me alegro tanto de haberte conocido, de pasar tiempo contigo, que ahora NO te pongas así y... ¡venga, anímate que eres fantástica!"

Da que é autora Alexandra Serrano Mickhavlova.

Así mesmo, despois de darmos a coñecer a autoría das mensaxes valoradas anonimamente, queremos facer un recoñecemento especial ao esforzo e constancia de varias persoas que levan participando en cada edición do concurso ao longo dos últimos anos.

A Coruña, 31 de maio de 2023

Fdo./ Mª Carmen González Rebollido

Fdo./ Margarita Sanz Páez

Fdo./ Patricia Cernadas Novo

Fdo./ Silvia Conde Regueiro

Fdo./ Ana González Botana

O acto de entrega de premios terá lugar o mércores 7 de xuño ás 19:00 h na Sala César Antonio Molina e Mercedes Monmany da Biblioteca, e contará coa presenza do Deputado de Cultura, Xurxo Couto.

Parabéns a todas as persoas galardoadas!