O centro EUROPE DIRECT da Deputación da Coruña impulsa a creación dunha rede de información europea para a mocidade en concellos da provincia

O centro EUROPE DIRECT A Coruña vén de poñer en marcha un servizo de información europea para mozos e mozas en colaboración con concellos da provincia. A través da iniciativa Europa no teu concello, o centro oficial de información da Comisión Europea da Deputación da Coruña distribuíu expositores para a súa instalación en dependencias municipais dedicadas á mocidade ou con alta concentración de persoas usuarias nesta franxa de idade, como poden ser as bibliotecas.

O obxectivo é crear unha rede de puntos de información directa e descentralizados nos municipios onde a xente nova pode atopar cada semana as últimas novidades de oportunidades laborais, de formación ou mobilidade que, entre outras, ofrece a Unión Europea. Tamén se ofrecerán outras informacións e publicacións de interese para este grupo de idade e materiais de utilidade.

Ata o momento, son 19 os concellos que se sumaron á iniciativa Europa no teu concello, que se comezou a despregar co inicio do novo ano. Abegondo, Ames, Boqueixón, Cabanas, Camariñas, Cambre, Cariño, Cedeira, Culleredo, Dumbría, Fene, Narón, Ponteceso, Pontedeume, Rois, Sada, Valdoviño, Vedra e Vimianzo xa contan cun punto próximo e específico de información europea para os mozos e mozas do concello.

Os concellos ou centros de información xuvenil da provincia da Coruña que estean interesados en formar parte da rede, poden poñerse en contacto a través do correo electrónico europedirect@dacoruna.gal.

Para información complementaria, pódese consultar a páxina web

https://dacoruna.gal/europedirect/europe-direct-coruna/agenda/2022/europa-no-teu-concello