O espectáculo ‘A Maxia de Europa’ de EUROPE DIRECT A Coruña leva a oito concellos da provincia os valores, símbolos e oportunidades da Unión Europa
A función poderá verse durante o mes de agosto en Pontedeume, Lousame, Rois, Dumbría, Sada, Negreira, Valdoviño e Cabanas
Xogos, trucos, ilusión, humor e información europea reúnense nesta actividade para todos os públicos
EUROPE DIRECT A Coruña organiza unha actividade lúdica e máxica que levará durante o mes de agosto os valores, símbolos e oportunidades da Unión Europea a oito concellos da provincia adheridos á rede Europa no teu Concello. O espectáculo itinerante 'A Maxia de Europa' percorrerá Pontedeume, Lousame, Rois, Dumbría, Sada, Negreira, Valdoviño e Cabanas entre o día 2 e o 25 deste mes.
'A Maxia de Europa' reúne xogos, trucos, ilusións e humor para realizar unha viaxe máxica e dinámica para maiores e pequenos a través dos valores, símbolos, beneficios e algún dos programas da Unión Europea. O público asistente poderá seguir os trucos de maxia realizados coas bandeiras europea e dos estados membro ou a moeda común, entre outros elementos.
O espectáculo estará guiado polo mago Pedro Bugarín, un ilusionista con máis de 15 anos de experiencia no seu eido e que tamén ten vivido múltiples experiencias de mobilidade en Europa.
'A Maxia de Europa' chegará no mes o día 2 a Pontedeume, o 4 a Lousame, o 9 a Rois, o 11 a Dumbría, o 16 a Sada, o 18 a Negreira, o 23 a Valdoviño e pechará o percorrido o día 25 de agosto en Cabanas. Toda a información dispoñible está recollida na páxina: https://dacoruna.gal/europedirect/europe-direct-coruna/agenda/2023/la-magia-de-europa1/
Este espectáculo itinerante forma parte da programación que Europa no teu Concello ofrece aos membros da rede. EUROPE DIRECT A Coruña puxo en marcha esta iniciativa, da que xa forman parte 34 concellos, para aproximar a información sobre a Unión Europea a toda a cidadanía da provincia, en especial, da mocidade.
EUROPE DIRECT A Coruña é un centro de información oficial da Comisión Europea que pertence á Deputación da Coruña. A misión do centro, que iniciou a súa traxectoria no ano 1996, é traballar coa cidadanía, os medios de comunicación e as entidades locais cos obxectivos de implicar á poboación en temas europeos, así como proporcionar contidos sobre as políticas e as prioridades da UE. Tamén axudar á Comisión Europea a adquirir unha visión xeral das sensibilidades locais relacionadas coas súas políticas e promover a cidadanía europea activa nas escolas.
Para información complementaria, pódese contactar a través do correo electrónico europedirect@dacoruna.gal, ou ben, no número de teléfono 981 080 331.