A Deputación destina 73.500 euros para financiar o servizo de transporte escolar do Centro de día de menores de Ferrol
Consiste na recollida de menores á saída dos centros escolares situados nos Concellos de Ferrol e Narón, e no seu posterior traslado ao Centro para a prestación do servizo de comedor
O número de prazas dispoñibles para o transporte será de 30, e as idades dos menores deberán estar comprendidas entre os 3 e os 13 anos
A Deputación da Coruña vén de sacar a licitación pública o servizo de transporte escolar do Centro de día de menores de Ferrol, ao que destina un investimento de 73.500 euros para dúas anualidades.
O obxectivo deste servizo é o de levar a cabo a recollida de menores nos diferentes centros educativos dos Concellos de Ferrol e Narón, para o seu posterior traslado ao Centro para a prestación do servizo de comedor e as distintas actividades e servizos que ofrece o centro. O número de beneficiarios deste transporte escolar establécese en 30, que deberán ser menores comprendidos entre os 3 e os 13 anos de idade.
A previsión dos tramos horarios delimítase entre as 13:45 horas (hora de saída dos menores dos respectivos centros escolares) ata as 14:45 horas (hora de chegada ao CDM).
A empresa adxudicataria deberá establecer o número de autobuses necesarios para prestar o servizo, que estará determinado polo número de centros educativos onde deba recoller aos usuarios que, á súa vez, irá en función das solicitudes presentadas nas propias entidades de ensinanza.
O prazo para a presentación de ofertas rematará o próximo venres 2 de decembro.
A deputada Ana Lamas sinala que o transporte é un servizo moi demandado polas familias, que usan case un terzo dos 64 usuarios e usuarias do centro. A falta de transporte pode ocasionar baixas no centro por mor das dificultades de desprazamento derivadas das necesidades de conciliación das familias, unha situación que preocupa a área de Benestar Social que quere evitar cubrindo o servizo de transporte dos menores desde a propia Deputación da Coruña.