Formoso afirma que o despoboamento no rural e o cambio climático son “os dous grandes retos que afrontar para acabar cos incendios forestais”
O presidente provincial pide bonificacións fiscais para as empresas que se asenten no rural e que nas licitacións públicas se incorporen cláusulas demográficas que prime ás concesionarias que decidan prestar servizos desde o rural
"Temos que pasar das palabras aos feitos", expuxo González Formoso, que citou que "a Deputación instalou no pequeno concello da Capela a única oficina de Galicia que apoia os concellos na xestión dos fondos Next Generation.
A Deputación organizou hoxe en Culleredo, xunto con Next Educación e a European Climate Fundation, o foro 'La lacra de los incendios forestales'.
O presidente da Deputación da Coruña, Valentín González Formoso, afirmou hoxe que "o despoboamento no rural e o cambio climático" son os dous grandes retos que enfrontar para acabar cos incendios forestais.
Fíxoo durante a súa intervención no foro 'La lacra de los incendios forestales', organizado pola Deputación da Coruña xunto con Next Educación e a European Climate Fundation, que se realizou no auditorio do Edificio de Servizos Múltiples do Concello de Culleredo, e que foi inaugurado polo alcalde e deputado de Transición Ecolóxica, José Ramón Rioboo, o xonalista Manuel Campo Vidal e o propio Formoso.
O presidente da Deputación cualificou a cifra de incendios do pasado verán, con máis de 46.000 hectáreas queimadas en Galicia, de "dramática" e chamou a "deixar de falar cunha terminoloxía baleira sobre os incendios", facendo a alusión a que "o reto demográfico e o despoboamento do rural están en todos os programas electorais e no discurso de calquera político pero aterrar esa terminoloxía e esa preocupación é francamente difícil se non se está disposto a revolucionar o seu propio país".
"Non pode ser que en Galicia haxa unha superficie abandonada tan grande nun país tan produtivo e onde hai tanto talento, tanta xuventude que emigra de Galicia, podería non facelo se este país fose máis produtivo", afirmou González Formoso, que cree que "hai que adoptar medidas valentes, tanto desde a Xunta de Galicia como desde o Goberno do Estado, todos e todas temos deberes".
O presidente provincial volveu poñer enriba da mesa "medidas contundentes" como as relacionadas coa política fiscal, entendendo que "un imposto de sociedades ten que ter algún tipo de bonificación para aquel que aposta de verdade polo rural", ou coas licitacións públicas "nas que as administracións deben primar con algún criterio a aquela empresa adxudicataria do servizo que decida prestalo desde o ámbito rural", axudando a crear emprego e actividade.
"Temos que pasar das palabras aos feitos", expuxo Formoso que lembrou que "a Deputación vén de poñer en marcha na Capela a única oficina que hai en toda Galicia para apoiar os concellos na xestión de fondos europeos". "O lóxico é que estivese na Coruña, preto da Deputación, pero está nunha vila de 1.300 habitantes que se chama A Capela, e é unha decisión política", aseverou.
Ademais, tamén citou a nova oficina provincial 'Acelera Pyme' que apoia a transformación dixital dos concellos desde Ponteceso e fixo referencia ao servizo de Teleasistencia "que atende a 3.000 persoas de toda a provincia, maiores de 65 anos que viven en soidade nos seus domicilios, e que se presta desde unha nave situada nun polígono da cidade da Coruña. É algo que pode facerse en calquera pobo do rural..e así será", afirmou.
"Tomemos decisións, aínda hai marxe para facelo, pero sobre todo esixamos a quen ten que facelo que adopte decisións contundentes, non chega cunha convocatoria de axudas para cambiar un tellado nunha vivenda de rural", salientou, explicando que "hai que comezar a lexislar tendo unha visión bifocal das cousas, non se poden adoptar decisións coa mentalidade do urbano para o rural, cada contorna e cada realidade son distintas polo que esixen normativas distintas".
O presidente rematou a súa intervención concluíndo que "os incendios resolveranse cando volvamos producir no rural, cando a xente volva a vivir no rural, se somos capaces de garantirlle servizos como ter un centro de saúde preto, un colexio ao que levar os seus fillos e fillas, ou un autobús que o transporte cara os centros públicos onde haxa outro tipo de prestacións máis completas".
"Se non o facemos, pasaremos a gastar o dobre en extinción, seguiremos perdendo poboación, o sector primario seguirá perdendo explotacións e o rural seguirá esmorecendo", sostivo.
Relatorios de expertos e profesionais de diferentes sectores
O foro 'La lacra de los incendios forestales', que estivo conducido polo xornalista Manuel Campo Vidal e no que tamén participou o alcalde de Culleredo, José Ramón Rioboo, incluíu, durante toda a xornada, diferentes relatorios.
O primeiro foi sobre a importancia da transición ecolóxica para loitar contra os incendios e correu a cargo do enxeñeiro de Montes, Juan Picos. Tamén se deu voz aos territorios afectados por vagas de lumes deste verán, como Boiro e o Barco de Valdeorras, coas intervencións dos seus alcaldes, José Ramón Romero e Alfredo García, acompañados dun representante da ASC Bombeiros de Galicia e dunha asociación veciñal.
Falouse das posibles solucións e da importancia da prevención e da loita contra o despoboamento fronte ao lume, cun coloquio no que participaron representantes dos principais medios de comunicación galegos: Alfonso A. Riveiro, director de El Progreso, María López Cedrón, responsable de Somos Agro en La Voz de Galicia, Ramón Valles, director de RTVE Galicia; Mario Moreno, director rexional de SER Galicia; Alejandro López, subdirector de informativos de TVG e Ana Martínez, delegada de Axencia EFE en Galicia.
A xornada pechouse analizando o papel das institucións, que defenderon representantes das catro deputacións galegas.
